بلند شہر میں ڈھائی سال کی بچی کا ریپ، ملزم 80 برس کا بوڑھا

بلند شہر میں 80 سال کے ایک بوڑھے نے ڈھائی سال کی معصوم بچی کا ریپ کر ڈالا۔ ملزم گرفتار کر لیا گیا ہے۔

بلندشہر: اترپردیش کے بلند شہر میں نرسینا تھانہ حلقے میں ایک شرمناک واقعہ سامنے آیا ہے۔ 80 سال کے ایک بوڑھے نے ڈھائی سال کی معصوم بچی کے ساتھ جنسی زیادتی جیسا گھناؤنا جرم انجام دیا۔ بچی کے والد کی شکایت پر پولیس نے ملزم کے خلاف مقدمہ درج کرکے ملزم کو گرفتار کر لیا ہے۔ معصوم بچی فی الوقت اسپتال میں زیر علاج ہے۔

بچی کی ماں بوڑھے کے گھر کام کرتی تھی

متاثرہ بچی دلت برادری سے تعلق رکھتی ہے۔ گاؤں والوں کے مطابق ساگر سنگھ نام کا ملزم گاؤں میں ایک ڈیری کے اوپر ایک کمرے میں رہتا ہے۔ ایک دلت خاندان ڈیری کے قریب ہی رہائش پذیر ہے۔ اس خاندان کی ایک عورت اس بوڑھے کے کمرے میں صاف صفائی کا کام کرنے جایا کرتی ہے۔

چھت پر کھیلتی بچی کے ساتھ درندگی

22 مارچ کی شام کو جب بچی کی ماں ملزم کے کمرے میں جھاڑو مارنے گئی تو اس کی ڈھائی سال کی بیٹی بھی اس کے پیچھے پیچھے وہاں پہنچ گئی۔ بچی کی ماں جھاڑو مار کر وہاں سے چلی آئی اور لڑکی وہیں کھیلتی رہی۔

متاثرہ بچی ملزم کے گھر کی چھت پر کھیل رہی تھی۔ بوڑھے نے اسے اکیلا دیکھ کر اپنی ہوس کا شکار بنا لیا۔ اس کی درندگی کی وجہ سے بچی کی زندگی خطرے میں ہے اور اس کی حالت تشویشناک بتائی جا رہی ہے۔

بچی چیخ سن کر گاؤں والے جمع ہوگئے

مقامی لوگوں کے مطابق بوڑھے نے لڑکی کو اکیلا پا کر اپنی ہوس کا شکار بنا لیا۔ آس پاس کے لوگوں لڑکی کی چیخیں سن کر دوڑ پڑے۔ لوگوں کو آتا دیکھ کر بوڑھا بھاگنے لگا۔ مگر گاؤں والوں نے بوڑھے کو پکڑ کر پولیس کو واردات کی اطلاع دی۔

مقدمہ درج، ملزم گرفتار

بچی کے بابا کی تحریری شکایت کی بنیاد پر پولیس نے ملزم کے خلاف مقدمہ درج کر کے گرفتار کر لیا۔ ایس پی سٹی شنکر پرساد نے بتایا کہ اس معاملے میں رپورٹ درج کر لی گئی ہے۔ لڑکی کو علاج کے لیے ضلع اسپتال میں داخل کرایا گیا ہے۔ ملزم کو گرفتار کر کے پوچھ گچھ شروع کر دی گئی ہے۔ اسے عدالتی حراست میں بھیجا جا رہا ہے۔