علی گڑھ: ہردوا گنج میں ہجومی تشدد کے معاملے میں جاری پولیس کی تحقیقات میں اس وقت موڑ آگیا جب لیبارٹری کی رپورٹ میں اس بات کی تصدیق کی گئی ہے کہ ضبط شدہ گوشت کا نمونہ "گائے یا کسی گائے کی نسل" سے تعلق نہیں رکھتا تھا۔ ایک پولیس افسر نے بتایا کہ 24 مئی کو ایک پرتشدد ہجوم نے ممنوعہ مویشیوں کا گوشت لینے کا الزام لگاتے ہوئے چار افراد پر حملہ کردیا تھا۔
ایس پی دیہی امرت جین نے بدھ کو پی ٹی آئی کو بتایا کہ پولیس نے متاثرین کو ہجوم سے بچایا اور انہیں اسپتال میں داخل کرایا۔ جین نے کہاکہ "گوشت کے نمونے کو جانچ کے لیے ایک سرکاری لیبارٹری میں بھیجا گیا تھا۔ گوشت کے نمونے کی فرانزک رپورٹ نے اس بات کی تصدیق کی ہے کہ یہ گائے یا کسی گائے کی نسل کا گوشت نہیں تھا۔ ہم واقعات کی چھان بین کر رہے ہیں اور نتائج کی بنیاد پر کارروائی کریں گے۔"
افسر نے تصدیق کی کہ متاثرین کی طرف سے درج کرائی گئی ایف آئی آر میں نامزد چار افراد کو پہلے ہی گرفتار کیا جا چکا ہے، مزید گرفتاریوں کی توقع ہے کیونکہ اس معاملہ میں ملوث دیگر افراد کو پولیس کی جانب سے تلاش کیا جارہا ہے۔ ابتدائی رپورٹ میں 12 مبینہ حملہ آوروں اور 25 نامعلوم افراد کے نام درج تھے۔
دریں اثنا، مختلف جماعتوں کے اپوزیشن لیڈران بشمول ممبران پارلیمنٹ جنہوں نے ہجومی تشدد کے بعد علی گڑھ کا دورہ کیا، حملے میں ملوث تمام افراد کے خلاف سخت کارروائی کا مطالبہ کیا ہے۔
عام آدمی پارٹی کے ایم پی سنجے سنگھ، جنہوں نے منگل کو جواہر لعل نہرو میڈیکل کالج ہسپتال کا دورہ کیا، میڈیا کو بتایا کہ ہردوگنج میں ہجومی تشدد معاشرے کو پولرائز کرنے کے لیے ایک اور واقعہ سامنے آیا ہے۔" انہوں نے اس کیس کو نمٹانے کے لیے فاسٹ ٹریک عدالت کا مطالبہ کیا ہے۔ کانگریس پارٹی کے ایک وفد نے بشمول ایم پی عمران مسعود اور سابق ایم پی کنور دانش علی نے بھی منگل کو اسپتال میں چار زخمیوں سے ملاقات کی۔
راجیہ سبھا کے رکن رام جی لال سمن کی قیادت میں سماج وادی پارٹی (ایس پی) کے رہنماؤں کا ایک وفد بدھ کو متاثرین سے ملنے علی گڑھ پہنچنے کی توقع ہے۔
