حیدرآباد: (انشومن بہیرا) جموں و کشمیر میں دہشت گردوں نے ایک بار پھر حملہ کیا ہے۔ اگرچہ آرٹیکل 370 کی منسوخی کے بعد اس طرح کے حملوں کی تعادد میں نمایاں کمی آئی ہے، لیکن دہشت گردی کا مکمل خاتمہ نہیں ہوا ہے۔ 22 اپریل 2025 کو، جموں و کشمیر کے ایک مشہور سیاحتی مقام پہلگام میں ایک وحشیانہ حملے میں کم از کم چھبیس افراد ہلاک اور بیس زخمی ہوگئے، جن میں زیادہ تر سیاح تھے۔ آرٹیکل 370 کی منسوخی کے بعد ابھرنے والی ایک نسبتاً نئی دہشت گرد تنظیم دی ریزسٹنس فرنٹ (ٹی آر ایف) جسے لشکر طیبہ کی شاخ کے طور پر جانا جاتا ہے، نے ذمہ داری قبول کی ہے۔لشکر پاکستان میں قائم کی گئی ایک دہشت گرد تنظیم ہے۔ یہ حملہ گزشتہ چھ مہینوں میں غیر مقامی شہریوں کو نشانہ بنانے والے پرتشدد کارروائیوں میں سب سے بھیانک ہے جو 20 اکتوبر 2023 کو گاندربل میں ہوئے غیر مقامی مزدوروں پر حملے کے ساتھ مماثلت رکھتا ہے جہاں ایک مقامی ڈاکٹر اور چھ غیر مقامی کارکن مارے گئے تھے۔ اس تازہ ترین حملے کے بارے میں کئی ایسے سوالات ابھر آتے ہیں جو اسے کسی گہری سازش کا حصہ ظاہر کرتے ہیں۔ ۔یہ حملہ عین اس وقت ہوا جب امریکہ کے نائب صدر ہندوستان کے سرکاری دورے پر ہیں اور جنوب ایشیائی خطے میں کئی محاذوں پر تزویراتی تبدیلیاں رونما ہورہی ہیں جب کہ مسلم اکثریتی جنوبی ایشیائی ممالک میں بدلتی ہوئی سیاسی حرکیات، جموں و کشمیر میں سیاسی اور اقتصادی استحکام کی واپسی، اور ہندوستان میں اندرونی فرقہ وارانہ کشیدگی کا ماحول ہے۔ ایسے میں اس واقعے کا ایک جامع تجزیہ لازمی ہو جاتا ہے۔
ایک ایسے وقت میں جب دہشت گردی کے بنیادی محرکات جیسے علیحدگی پسند نظریات، مذہبی انتہا پسندی اور پاکستان کی براہ راست حمایت سمیت دیگر عوامل بدستور موجود ہیں، جموں و کشمیر میں ابھرتا ہوا سیاسی منظرنامہ ایک اہم عنصر کے طور سامنے آ رہا ہے۔ 2019 میں آرٹیکل 370 کی منسوخی کے بعد، جس نے جموں و کشمیر کو مرکز کے زیر انتظام علاقہ میں تبدیل کر دیا، دہشت گردی کی سرگرمیوں میں واضح کمی آئی ہے۔ سیاسی نمائندگی کے زیادہ تر دیرینہ مطالبے کو 2024 کے اسمبلی انتخابات کے ذریعے پورا کیا گیا، جس میں اسی سال عام انتخابات کی طرح حق رائے دہی میں اضافہ دیکھا گیا۔ تشدد میں کمی، ایک منتخب حکومت، اور مرکزی حکومت کے جاری ترقیاتی اقدامات کے ساتھ، جموں و کشمیر مستقل طور پر ایک پسندیدہ سیاحتی مقام کے طور پر ابھرا ہے۔ مرکز کے زیر انتظام علاقے کے محکمہ سیاحت کے اعداد و شمار کے مطابق، پچھلے پانچ سالوں میں سات کروڑ سے زیادہ ہندوستانی اور غیر ملکی سیاحوں نے جموں و کشمیر کا دورہ کیا ہے۔
طویل عرصے سے عسکریت پسندی اور تنازعات کے بوجھ تلے دبے خطہ کے لیے ایسے اعداد و شمار ترقی کی نشاندہی کرتے ہیں۔ تاہم استحکام اور معاشی سرگرمیوں میں یہ بحالی پاکستان سمیت علیحدگی پسند اور انتہا پسند قوتوں کے اہداف کے براہ راست مخالف ہے۔ غیر مقامی کارکنوں اور اب سیاحوں کو نشانہ بنانے والے حالیہ حملے اس ابھرتے ہوئے استحکام کو تباہ کرنے کے لیے بنائے گئے ہیں۔ پہلگام حملے کو جنوبی ایشیا کے مسلم اکثریتی ممالک میں بدلتے ہوئے سیاسی دھارے کے وسیع تناظر میں بھی دیکھا جانا چاہیے۔ حالیہ برسوں میں، بنیاد پرست اسلام پسند گروہوں نے افغانستان اور بنگلہ دیش جیسے ممالک میں اقتدار پر اپنی گرفت مضبوط کر لی ہے۔ افغانستان میں طالبان کی اقتدار میں واپسی نے پورے خطے میں انتہا پسندوں کی حوصلہ افزائی کی ہے۔ بنگلہ دیش میں، اسلامی جماعت اسلامی بنگلہ کی طرف سے طلباء کی قیادت میں ہونے والے مظاہروں کے ذریعے شیخ حسینہ کی سیاسی بے دخلی نے بھارت کے سیکورٹی خدشات کو مزید بڑھا دیا ہے۔ پاکستان اور بنگلہ دیش کے درمیان تعلقات کی بحالی نے پیچیدگی کی ایک اور تہہ کا اضافہ کیا ہے۔
دہشت گردی کی حکمت عملی میں یہ تبدیلی واضح ہے۔ آرٹیکل 370 کی منسوخی کے بعد سے، سیکورٹی فورسز پر حملے کرنے سے لیکر غیر مقامی شہریوں کو نشانہ بنانے کی طرف ایک واضح تبدیلی آئی ہے۔ قابل توجہ ہے کہ اندھا دھند حملے کے دوران خاص طور پر غیر مسلموں کو نشانہ بنانے پر توجہ مرکوز ہو گئی ہے۔ اکتوبر 2023 میں گاندربل میں جو حملہ ہوا تھا اس میں بھی بنیادی طور پر غیر مقامی کارکنوں کو ہلاک کیا گیا، جب کہ پہلگام حملہ سیاحوں پر ہی براہ راست کیا گیا۔ یہ ٹارگٹ کلنگ دہشت گردی کی حکمت عملی میں ایک پریشان کن ارتقاء کی عکاسی کرتی ہے -ایک تاثر یہ ہے کہ دہشت گرد امریکی نائب صدر کے دورے کے موقعے پر حملہ کرکے عالمی توجہ اپنی جانب بلانے کی دانستہ کوشش کررہے ہیں اور انکا مطمح نظر یہ ثابت کرنا ہے کہ جموں و کشمیر کا تنازع ابھی حل نہیں ہوا ہے بلکہ یہ بدستور حل طلب ہے۔
پہلگام حملہ ہندوستان کی انسداد دہشت گردی کی حکمت عملی کے بارے میں از سر نو سوچ بچار کی تحریک دیتا ہے۔ یہ سچ ہے کہ جموں و کشمیر میں دہشت گردی اور عسکریت پسندی پچھلے پانچ سالوں میں کافی حد تک کم ہوئی ہے، جس کی بڑی وجہ ایک مضبوط سیکورٹی فریم ورک، تیز رفتار ترقیاتی پروجیکٹ، اور جمہوری طرز کی حکمرانی کی بحالی ہے تاہم اس میں شک نہیں ہے کہ دہشت گردوں کے پاس اب بھی ایک بڑے پیمانے کی کارروائی کرنے کی سکت اور قوت موجود ہے۔
یہ غیر معمولی حملہ اس بات کو بھی ثابت کرتا ہے کہ عسکریت پسندوں کو مقامی سپورٹ نیٹ ورکس دستیاب ہے۔ اس طرح کی مدد کے بغیر، ان کارروائیوں کو انجام دینا کہیں زیادہ مشکل ہوگا۔ اس لیے، جب کہ انسداد دہشت گردی کے موجودہ اقدامات اور ترقیاتی اقدامات کو جاری رکھنا چاہیے، مقامی انتہاپسندوں کے بنیادی ڈھانچے کی شناخت اور اسے ختم کرنے کی اشد ضرورت ہے۔ اس سے بھی اہم بات یہ ہے کہ دہشت گرد تیزی سے ہندوستان کے سماجی تانے بانے کو غیر مستحکم کرنا چاہتے ہیں، ریاستی ردعمل میں کمزور افراد کو انتہاپسندانہ نظریات کا شکار ہونے سے روکنے کے لیے تخریب کاری کے پروگراموں اور کمیونٹی تک رسائی کی کوششوں کو شامل کرنا چاہیے۔
(مضمون نگار نیشنل انسٹی ٹیوٹ آف ایڈوانسڈ اسٹڈیز، بنگلورو میں ایسوسی ایٹ پروفیسر ہیں)
