لیہہ (رنچین انگمو چومکچھن) : لیہہ میں ضلع کانگریس کمیٹی نے لداخ میں زمین اور ملازمت کی حفاظت سے متعلق اہم مسائل کو حل کرنے کے لیے ایک میگا ریلی کا انعقاد کیا۔ ریلی کے دوران، مقررین نے زمین کی الاٹمنٹ کے عمل، بھرتیوں میں تاخیر، اور کلیدی ترقیاتی منصوبوں پر مقامی کمیونٹی کے ساتھ مشاورت کی کمی پر اپنی مایوسی کا اظہار کیا۔
اٹھائے گئے مسائل میں حکومت کی طرف سے شمسی توانائی کے منصوبوں کے لیے زمین کا انتظام، پبلک سیکٹر کی بھرتیوں میں جمود، اور کونسل کے پاس موجود ضروری اختیارات کو منجمد کرنا شامل تھے۔
ضلع کانگریس کمیٹی کے صدر رگزن نمگیال نے کہا کہ یہ میگا ریلی زمین اور بھرتی سے متعلق مسائل کو حل کرنے کے لیے منعقد کی گئی تھی، کیونکہ ہمارا ماننا ہے کہ یہ وقت کی ضرورت ہے۔ ہم نے محسوس کیا کہ ہمارے پاس ہل کونسل اور ایل جی انتظامیہ کو جھنجھوڑنے کے سوا کوئی چارہ کار نہیں ہے اور اگر ان دو اداروں نے ہمارے مسائل حل کرنے کی جانب توجہ نہیں دی تو ہمیں جدوجہد کا راستہ اپنانا پڑے گا۔
انہوں نے مزید کہا کہ لداخ کے باشندے شمسی توانائی کے منصوبوں کے خلاف نہیں ہیں، لیکن جہاں بھی امکان ہے، فیصلہ سازی کے عمل میں مقامی لوگوں کو شامل کرنا ضروری ہے، ہوا یہ کہ 15 فروری کو پاور ڈیولپمنٹ اور نئی اور قابل تجدید توانائی کے سیکریٹری نے ایک نوٹس جاری کیا، جس کے بعد متعلقہ اتھارٹی نے محکمہ ریونیو کو 649.55 مربع کلومیٹر زمین کی نشاندہی کرنے کی ہدایت کی، تاہم ہم یہ نہیں جانتے کہ کونسل کو تمام زمینوں کی منظوری دی جائے۔ انہیں اس بات کا علم تھا یا نہیں، ہم نے یہ سوال اٹھانے کی کوشش کی کہ کیا انہوں نے اس فیصلے پر بحث کی ہے، وہ کس طرح مقامی لوگوں سے مشورہ کیے بغیر زمین کی الاٹمنٹ کا عمل شروع کر رہے ہیں۔
سمنلا دورجے نوربو، کونسلر ساسپول، ایل اے ایچ ڈی سی، لیہہ نے کہا کہ مالی سال 2024-25 میں، لداخ میں لیفٹیننٹ گورنر کی رہائش گاہ پر 13 کروڑ سے زیادہ خرچ کیے گئے ہیں۔ میں نے چند ماہ قبل ایک آر ٹی آئی دائر کی تھی، اور انہوں نے میرے سوال کے بارے میں جواب دیا تھا۔ انکے مطابق ایک مہمان خانہ بنایا گیا ہے جس میں اعلیٰ ترین سہولیات رکھی گئی ہیں، رہائش کے مرکزی دروازے پر 1.36 کروڑ کی لاگت آئی ہے جبکہ گرین ہاؤس پر 50 لاکھ روپے صرف کئے گئے ہیں۔ پھولوں اور خوبانی کے درختوں کو سیراب کرنے کے لیے 3 کروڑ 60 لاکھ روپے کی لاگت سے ایک تالاب بنایا گیا ہے۔ نوربو کے مطابق یہ انتظامیہ کی جانب سے فنڈز کا غلط استعمال ہے تاہم ہمارا اصل ایجنڈا زمین اور نوکریاں ہیں اور ہم نے اس کا ثبوت عوام کو دکھایا ہے۔
انہوں نے کہا کہ بطور اپوزیشن، حکمران جماعت کو چوکنا کرنا ہمارا فرض ہے۔ لوگوں کو نوکریوں اور زمینوں کے بارے میں تحفظات ہیں۔ جب سے لداخ ایک مرکزی زیر انتظام علاقہ (یونین ٹیریٹری) بن گیا ہے، زمین کی الاٹمنٹ رک گئی ہے۔ زمین کے لیز کی تجدید نہیں ہو رہی ہے، بستیاں قائم نہیں ہو رہی ہیں، اور ہم نے لوگوں کو بیدار کرنے اور ہوشیار کرنے کی کوشش کی۔ لداخ ایک بار پھر متحد ہو گیا ہے اور ہمیں کارروائی کرنے کی ضرورت ہے۔
فیانگ کے کونسلر ٹنڈپ نوربو نے ای ٹی وی بھارت کو بتایا کہ حکومت اور کارپوریٹس لداخ میں زمین لینے کی کوشش کر رہے ہیں۔ ہم لداخ کے لیے لداخ کی حفاظت کے لیے کام کر رہے ہیں۔ کونسل کے تینوں اختیارات بشمول زمین کی الاٹمنٹ مرکزی وزارت داخلہ نے منجمد کردی ہے ۔ نان لیپسیبل فنڈز کو استعمال کرنے پر پابندی عائد کی گئی ہے، عوام کے لیے نئی زمینوں کی الاٹمنٹ نہیں کی جا رہی ہے اور ماضی میں الاٹ کی گئی زمین کی بھی تجدید نہیں کی جا رہی ہے۔
یہ بھی پڑھیں:
لداخ میں بودھوں کا احتجاج، بودھ گیا میں عبادت گاہ کا کنٹرول دیا جائے
کرگل-گاندربل سرحدی تنازعہ: ہائی کورٹ نے حکومت کو جواب داخل کرنے کے لیے مزید چار ہفتے دیے
