کشمیر سے نکالے جانے والے پاکستانیوں میں شوریہ چکر جیتنے والے کی والدہ بھی شامل

عسکریت پسندوں سے لڑتے ہوئے شہید ہونے والے کانسٹیبل مدثر احمد شیخ کی والدہ شمیمہ اختر ملک بدر کیے جانے والوں میں سے ایک ہیں

سری نگر: جموں و کشمیر میں حکام نے منگل کو 60 پاکستانیوں کو واپس بھیجنے کا عمل شروع کیا۔ ان میں سے ایک شوریہ چکر جیتنے والے کی ماں بھی ہے جو دہشت گردانہ حملے میں شہید ہوگئے تھے۔ حکام نے کہا کہ ان تمام کو مختلف اضلاع سے اکٹھا کیا گیا اور بسوں میں پنجاب لے جایا گیا جہاں انہیں واہگہ بارڈر پر پاکستانی حکام کے حوالے کیا جائے گا۔

گزشتہ ہفتے پہلگام دہشت گردانہ حملے کے بعد، مرکز نے متعدد اقدامات کا اعلان کیا تھا، بشمول سندھ آبی معاہدہ کو معطل کرنا، اسلام آباد کے ساتھ سفارتی تعلقات کو کم کرنا، اور مختصر مدت کے ویزے پر تمام پاکستانیوں کو 27 اپریل تک ہندوستان چھوڑنے یا کارروائی کا سامنا کرنے کا حکم دینا۔ ملک بدر کیے گئے 60 افراد میں سابق دہشت گردوں کی بیویاں اور بچے شامل ہیں جو 2010 کی بحالی کی پالیسی کے تحت وادی واپس آئے تھے۔ ان میں سے 36 سری نگر میں، نو بارہمولہ اور کپواڑہ میں، چار بڈگام میں اور دو شوپیاں ضلع میں رہ رہے تھے۔

مئی 2022 میں عسکریت پسندوں سے لڑتے ہوئے شہید ہونے والے کانسٹیبل مدثر احمد شیخ کی والدہ شمیمہ اختر ملک بدر کیے جانے والوں میں سے ایک ہیں۔ مدثر جموں و کشمیر پولیس کی انٹیلی جنس ٹیم کا حصہ تھے جس نے غیر ملکی دہشت گردوں کے ایک گروپ کو روکا تھا۔

شیخ کو بعد از مرگ شوریہ چکر سے نوازا گیا۔ شمیمہ نے یہ ایوارڈ اپنے شوہر کے ساتھ مئی 2023 میں دہلی میں صدر دروپدی مرمو سے حاصل کیا۔

مدثر کے چچا محمد یونس نے صحافیوں کو بتایا، میری بھابھی کا تعلق پاکستان کے زیر قبضہ کشمیر سے ہے، جو ہمارا علاقہ ہے۔ صرف پاکستانیوں کو واپس بھیجا جائے۔ انہوں نے کہا کہ مدثر کی موت کے بعد مرکزی وزیر داخلہ امت شاہ نے اہل خانہ سے ملاقات کی تھی اور لیفٹیننٹ گورنر نے بھی دو بار ان سے ملاقات کے لئے آئے تھے۔

یونس نے بتایا کہ جب میری بھابھی یہاں آئیں تو ان کی عمر 20 سال تھی اور اب وہ 45 سال سے یہاں مقیم ہیں۔ میری (وزیراعظم نریندر مودی) اور امیت شاہ سے اپیل ہے کہ وہ ایسا نہ کریں۔

بتا دیں کہ شمیمہ نے 1990 میں ریٹائرڈ پولیس افسر محمد مقصود سے شادی کی تھی۔ بارہمولہ شہر کے مرکزی چوک کو پولیس اہلکار کی یاد میں شہید مدثر چوک کا نام دیا گیا ہے۔