گاندربل: وادیٔ کشمیر میں ان دنوں اخروٹ اتارنے کا سیزن عروج پر ہے۔ اس سلسلے کے تحت ضلع گاندربل میں بھی اخروٹ اتارے جا رہے ہیں۔ گاندربل ضلع کے اکہاں کنگن علاقے میں اتوار کو اخروٹ کے درخت سے گر کر ایک شخص کی موت واقع ہوگئی۔ اطلاعات کے مطابق اکہاں کنگن میں اس وقت ایک شخص کی موت واقع ہوئی جب وہ اخروٹ کے پیڑ سے اخروٹ اتار رہا تھا، تاہم اسی درمیان وہ اچانک پھسل گیا اور درخت سے گر پڑا۔
ذرائع کے مطابق نذیر احمد وانی ولد عبد العزیز وانی اتوار کے روز اخروٹ کے پیڑ پر چڑھ کر اخروٹ اتار رہا تھا کہ اسی دوران وہ توازن کھو کر درخت سے نیچے گر گیا اور شدید زخمی ہو گیا۔ اگرچہ اس کو فوری نزدیکی اسپتال پہنچایا گیا جہاں سے اس کی نازک حالت کو دیکھتے ہوئے فوری طور پر سکمز منتقل کیا گیا، جہاں پہنچنے پر ڈاکٹروں نے اسے مردہ قرار دے دیا۔ پولیس نے اس سلسلے میں ایک معاملہ درج کرتے ہوئے تحقیقات کا آغاز کر دیا ہے۔ قانونی اور طبی رسوم پوری کرنے کے بعد لاش کو ورثا کے سپرد کر دیا گیا ہے۔
یہ بھی پڑھیں: لارنو: ایک شخص اخروٹ کے درخت سے گرکر شدید زخمی Walnut Tree Falling Tragedy اخروٹ کے درخت سے گرنے سے دو افراد ہلاک |
آپ کو بتا دیں کہ اخروٹ کے درختوں سے اخروٹ اتارنا جہاں اپنی نوعیت میں ایک منفرد کام ہے، وہیں یہ ایک ایسا جوکھم بھرا کام بھی ہے جس میں اس کام میں مصروف شخص کو جان گنوانے کا خطرہ ہر وقت لگا رہتا ہے۔ اخروٹ کے درخت دیگر پھلوں کے درخت جیسے سیب، انار اور ناشپاتی وغیرہ سے قد و قامت میں بڑے ہوتے ہیں اور ان سے اخروٹ اتارنے کا عمل بھی مذکورہ درختوں سے پھل اتارنے کے کاموں سے بھی مختلف ہے۔
اخروٹ اتارنے کے کام میں ماہر کوئی مزدور مشکل سے ہی ملتا ہے۔ اس کام میں مہارت کے ساتھ ساتھ مزدور کا ہوشیار، بیدار مغز اور بہادر ہونا بھی پہلی شرط ہے۔ اس کام کا ماہر ایک لمبا سا ڈنڈا اٹھائے درخت کی ایک مضبوط شاخ پر بیٹھ کر زور زور سے باقی شاخوں پر ڈنڈا مارتا ہے جس سے ان پر لگے اخروٹ نیچے گر جاتے ہیں اور اس دوران ایسا بھی ہوتا ہے کہ توزان یا توجہ کھو جانے کے سبب مزدور خود بھی اخروٹوں کے ساتھ نیچے گر سکتا ہے۔
