جموں کشمیر کے جیلوں میں پانچ ہزار سے زائد قیدی، گنجائش چار ہزار سے بھی کم

جموں و کشمیر کے جیل گنجائش سے 37 فیصد زائد قیدیوں سے بھرے ہیں، زیر سماعت ملزموں کی تعداد سب سے زیادہ۔

سرینگر: جموں کشمیر کے جیل گنجان ہو چکے ہیں جہاں 15 جیلوں میں 3,860 قیدیوں کے لیے موجود گنجائش کے مقابلے میں 5,295 قیدی رکھے گئے ہیں۔ جموں و کشمیر محکمہ جیل خانہ جات کے مطابق یہ اعداد و شمار 30 اپریل 2025 تک کے ہیں، جس کا مطلب ہے کہ قیدیوں کی تعداد جیلوں کی اصل گنجائش سے 37.2 فیصد زیادہ ہے۔

مرکزی حکومت کے زیر یونین ٹیریٹری جموں کشمیر میں دو مرکزی جیلیں - جموں میں کوٹ بھلوال اور کشمیر میں سرینگر سنٹرل جیل شامل - ہیں، جبکہ متعدد ضلعی جیلیں، ایک ہولڈنگ سینٹر اور ایک اصلاحی مرکز بھی اس نظام کا حصہ ہیں۔ کوٹ بھلوال سب سے بڑی جیل ہے جس کی گنجائش 902 قیدیوں کی ہے، جبکہ سب سے چھوٹی جیل سب جیل ریاسی ہے، جہاں صرف 26 قیدی رکھنے کی گنجائش ہے۔ مجموعی طور پر یہ جیلیں تقریباً 1,438 کنال (179.75 ایکڑ) زمین پر پھیلی ہوئی ہیں۔

مرد قیدیوں کی تعداد غالب ہے: کل 5,144 مرد قیدیوں کے مقابلے میں صرف 151 خواتین قیدی ہیں۔ زیادہ تر قیدی بھارتی شہری ہیں جن کی تعداد 5,204 ہے، جبکہ 55 قیدی غیر ملکی ہیں ہیں، جن میں 51 مرد اور چار خواتین شامل ہیں۔

زیر سماعت قیدیوں کی تعداد سب سے زیادہ ہے، جن کی مجموعی تعداد 4,529 ہے، جن میں 4,499 بھارتی اور 30 غیر ملکی شامل ہیں۔ صرف 169 قیدیوں کو سزائیں سنائی جا چکی ہیں، جن میں نو غیر ملکی شامل ہیں۔ اس کے علاوہ 597 افراد احتیاطی قوانین جیسے پبلک سیفٹی ایکٹ (PSA) کے تحت نظر بند ہیں، جن میں 16 غیر ملکی بھی شامل ہیں۔ زیر سماعت قیدی جیل کی آبادی کا 85 فیصد سے زیادہ ہیں۔

عمر کے لحاظ سے، 26 سے 35 سال کے درمیان کے قیدیوں کی تعداد سب سے زیادہ ہے، جو کہ 1,942 ہے۔ 19 سے 25 سال کی عمر کے قیدیوں کی تعداد 1,454 ہے، جن میں 25 خواتین شامل ہیں۔ 36 سے 60 سال کی عمر کے قیدی 1,181 ہیں، ایک قیدی 18 سال سے کم عمر ہے جبکہ 137 قیدی 60 سال سے زائد عمر کے ہیں۔

خواتین قیدی جیل کی مجموعی آبادی کا صرف 2.8 فیصد ہیں۔ 160 بھارتی سزا یافتہ قیدیوں میں صرف تین خواتین ہیں۔ زیر سماعت خواتین قیدیوں کی تعداد 138 ہے (134 بھارتی اور چار غیر ملکی)، جبکہ نظر بند خواتین کی تعداد 10 ہے اور یہ سبھی بھارتی شہری ہیں۔

قیدیوں کے خلاف الزامات مختلف نوعیت کے ہیں، تاہم منشیات اور دہشت گردی سے متعلق مقدمات غالب ہیں۔ سزا یافتہ قیدیوں میں 57 قتل کے جرم میں، 35 زیادتی کے مقدمے میں اور 22 منشیات سے متعلق قوانین (این ڈی پی ایس ایکٹ) کے تحت سزائیں کاٹ رہے ہیں۔ تاہم کسی بھی سزا یافتہ قیدی پر یو اے پی اے، اغوا، چوری یا جوا کھیلنے کا الزام نہیں ہے۔

زیر سماعت قیدیوں میں سب سے زیادہ تعداد منشیات سے متعلق مقدمات کی ہے۔ کل 1,208 زیر سماعت قیدی این ڈی پی ایس ایکٹ کے تحت زیر تفتیش ہیں، اس کے بعد 922 پر یو اے پی اے کے تحت مقدمے ہیں۔ قتل اور زیادتی کے مقدمات میں بالترتیب 978 اور 493 زیر تفتیش قیدی شامل ہیں۔ 800 سے زائد زیر تفتیش نوجوان قیدی (25 سال سے کم عمر) سنگین جرائم جیسے قتل، زیادتی، منشیات اور دہشت گردی سے متعلق الزامات میں جیل میں بند ہیں۔

پبلک سیفٹی ایکٹ (PSA) کے تحت قید 308 افراد کی موجودگی سیکیورٹی خدشات کو اجاگر کرتی ہے، جن میں 10 خواتین بھی شامل ہیں۔ اس کے علاوہ 160 افراد منشیات سے متعلق مقدمات میں جبکہ 82 عسکریت پسندی سے متعلق الزامات میں نظر بند ہیں۔ پتھراؤ کے کسی بھی الزام میں فی الوقت کوئی قیدی موجود نہیں ہے۔

تعلیم کے لحاظ سے، 1,176 قیدی ناخواندہ ہیں، جبکہ 1,564 قیدیوں نے میٹرک تک کی تعلیم بھی مکمل نہیں کی ہے۔ تقریباً 750 قیدیوں نے 10+2 کی تعلیم حاصل کی ہے، 301 گریجویٹ ہیں، اور 106 پوسٹ گریجویٹ، جو تمام مرد ہیں۔ صرف 16 قیدیوں کے پاس پیشہ ورانہ ڈگریاں ہیں۔

19 سے 25 سال کی عمر کے 1,454 قیدیوں میں سے کئی پر سنگین الزامات ہیں: 299 این ڈی پی ایس ایکٹ، 326 یو اے پی اے، اور متعدد پر قتل و زیادتی کے مقدمات درج ہیں۔

جموں و کشمیر کی جیلوں کی تفصیل (30 اپریل 2025 تک)

زمرہ	تفصیل
کل جیلیں	15
کل گنجائش	3860
کل قیدی	5295
گنجائش سے زیادتی	37.2%

قیدیوں کی تقسیم (صنف اور قومیت کی بنیاد پر)

زمرہ	مرد	خواتین	کل
بھارتی	5093	147	5240
غیر ملکی	51	4	55
کل	5144	151	5295

قیدیوں کی قانونی حیثیت

زمرہ	بھارتی	غیر ملکی	کل
مجرم	160 (مرد:157، خواتین:3)	9 (مرد:9)	169
زیر سماعت	4499 (مرد:4365، خواتین:134)	30 (مرد:26، خواتین:4)	4529
نظر بند	581 (مرد:571، خواتین:10)	16 (مرد:16)	597

تعلیمی پس منظر

تعلیمی سطح	کل	مرد	خواتین
ناخواندہ	1176	1101	75
میٹرک سے کم	1564	1529	35
میٹرک پاس	1249	1228	21
انٹرمیڈیٹ	750	735	15
گریجویٹ	301	297	4
پوسٹ گریجویٹ	106	106	0
پروفیشنل ڈگری	16	16	0

جرائم کی نوعیت

جرم	تعداد	مرد	خواتین	25 سال سے کم عمر
قتل	57	54	3	1 مرد
زیادتی	35	35	0	2 مرد
NDPS	22	22	0	2 مرد
دیگر	(اسلحہ، جہیز، TADA)	متعدد	0-4	کم

زیر سماعت ملزمان کے جرائم

جرم	کل	مرد	خواتین	25 سال سے کم عمر
NDPS	1208	1174	34	299 مرد، 8 خواتین
UAPA	922	906	16	322 مرد، 4 خواتین
قتل	978	916	62	203 مرد، 6 خواتین
زیادتی	493	489	4	160 مرد، 2 خواتین

نظر بند افراد کے جرائم

جرم	کل	مرد	خواتین	25 سال سے کم عمر
PSA	308	298	10	51 مرد، 2 خواتین
NDPS	160	160	0	48 مرد
عسکریت	82	82	0	25 مرد
پتھراؤ	0	0	0	0

ماخذ: جموں کشمیر پرزنرس ڈیپارٹمنٹ