پہلگام (فیاض لولو) : پیپلز ڈیموکریٹک پارٹی (پی ڈی پی) صدر اور جموں کشمیر کی سابق وزیر اعلیٰ محبوبہ مفتی نے منگل کو پہلگام کا دورہ کرکے مقامی پارٹی کارکنان سمیت مختلف عوامی وفود سے ملاقات کی۔ ملاقات کے بعد میڈیا سے بات کرتے ہوئے انہوں نے کہا کہ ’’امرناتھ یاتریوں کی حفاظت پہلگام کے مقامی لوگوں کی اولین ذمہ داری ہے۔‘‘
انہوں نے کہا کہ پہلگام حملے کے بعد سیاحت کو کافی دھچکا لگا ہے اور پہلگام کے لوگ اس کا خمیازہ بھگت رہے ہیں۔ تاہم محبوبہ مفتی نے دعویٰ کیا کہ انہوں نے ’’پہلگام علاقے کا دورہ سیاحتی سرگرمیوں سے متعلق نہیں کیا بلکہ پہلگام خاص کر امرناتھ یاترا روٹ کے سبھی پی ڈی پی کارکنان سے خصوصی ملاقات کی۔‘‘ محبوبہ نے میڈیا نمائندوں کے ساتھ بات کرتے ہوئے کہا: ’’پہلگام کے لوگ ہی ہمیشہ سے یاتریوں کے محافظ رہے ہیں لہٰذا یہاں کے باشندوں پر ہی یاتروں کی ذمہ داری عائد ہوتی ہے۔‘‘
محبوبہ مفتی نے پہلگام کے باشندوں کو مخاطب بناتے ہوئے کہا: ’’آپ لوگوں کو ہی یہ یاترا کامیاب بنانی ہے، یاتریوں کی حفاظت کرنی پہلگام کے لوگوں کی ذمہ داری ہے، جیسا کہ یہ لوگ صدیوں سے کرتے آ رہے ہیں۔‘‘ سابق وزیر اعلیٰ کے مطابق: ’’یاترا کے کامیاب انعقاد کے بعد ہی لوگوں کا اعتماد بڑھے گا اور سیاح پھر سے یہاں کا رخ کریں گے اور سیاحتی سرگرمیاں پھر سے بحال ہو سکیں۔‘‘
دریں اثناء، محبوبہ مفتی نے مرکز سرکار سمیت جموں و کشمیر انتظامیہ سے پہلگام میں ’’حفاظتی اقدامات کے پیش نظر بند کی گئی سبھی پارکس/سیاحتی مقامات‘‘ کو دوبارہ کھولے جانے کی اپیل کی تاکہ سیاحتی سرگرمیاں پوری طرح بحال ہو سکیں اور مقامی معیشت مستحکم ہو سکے۔
یہ بھی پڑھیں:
