شوپیان (شاہد ٹاک): جنوبی کشمیر کے شوپیاں ضلع میں نقب زنوں نے اسٹیٹ بینک آف انڈیا (SBI) کے ایک اے ٹی ایم (ATM) کو لوٹنے کی کوشش کی، تاہم وہ اس میں ناکام رہے۔ حکام کا کہنا ہے کہ یہ اے ٹی ایم مین مارکیٹ میں کلاک ٹاور کے قریب نصب ہے۔ اس سے قبل بھی شوپیاں سمیت جنوبی کشمیر کے کولگام ضلع میں اے ٹیم مشینوں کو دوران شب لوٹنے کی کوششیں کی جا چکی ہیں۔
ذرائع کے مطابق، دوران شب نقب زنوں نے اے ٹی ایم دکان کا شٹر توڑ کر اور سی سی ٹی وی کیمرے کو نقصان پہنچایا اور مشین کو توڑنے کی کوشش کی۔ حکام کا کہنا ہے کہ نقب زن، اے ٹی ایم کو توڑ کر رقم نکالنے میں ناکام رہے اور موقع سے فرار ہوگئے۔
واقعے کی اطلاع بینک عملے نے فوری طور پر جموں کشمیر پولیس کو دی، جس کے بعد پولیس کی ٹیم جائے واردات پر پہنچی اور حالات کا جائزہ لے کر تحقیقات شروع کر دی۔ شوپیاں پولیس کا کہنا ہے کہ اس ضمن میں کیس درج کرکے تفتیش شروع کر دی ہے اور سبھی ثبوت و شواہد جمع کرکے جلد ہی نقب زنوں کو گرفتار کرکے ان کے خلاف قانون کے مطابق کارروائی انجام دی جائے گی۔
یہ بھی پڑھیں :
جموں، اے ٹی ایم رقم میں ہیرا پھیری کے ملزم کے خلاف چارج شیٹ فائل
