اننت ناگ : اننت ناگ پولیس نے این ڈی پی ایس ایکٹ کے تحت ایک کروڑ مالیت کی جائیداد قرق کی۔ منشیات کی اسمگلنگ اور اس کے مالیاتی نیٹ ورکس کے خلاف ایک اہم کارروائی کرتے ہوئے، اننت ناگ پولیس نے ضلع اننت ناگ کے چینی گنڈ سریگفوارہ کے رہنے والے عبدالمجید بٹ، دامادہ محمد احسن گنائی کا دو منزلہ زیر تعمیر رہائشی مکان ضبط کیا جو ایک کنال اراضی پر مشتمل ہے، مکان کی قیمت ایک کروڑ بتائی جارہی ہے۔
مذکورہ جائداد این ڈی پی ایس ایکٹ کے سیکشن 68-ایف کے تحت منسلک کی گئی ہے، پولیس کے مطابق مذکورہ جائداد منشیات کی اسمگلنگ سے حاصل ہونے والی آمدنی سے تعمیر کی گئی ہے۔ ملزم پولیس سٹیشن سری گفوارہ میں ایف آئی آر نمبر 68/2021 کے تحت درج منشیات کے ایک بڑے کیس میں ملوث ہے، جس میں کافی مقدار میں ممنوعہ اشیاء برآمد کی گئیں۔
ایک پولیس افسر نے کہا کہ یہ کارروائی اننت ناگ پولیس کی منشیات کی لعنت سے نمٹنے اور منشیات کی غیر قانونی تجارت کو برقرار رکھنے والے مالیاتی نیٹ ورکس کو ختم کرنے کے پختہ عزم کو اجاگر کرتی ہے۔ سخت اقدامات اٹھانے کا مقصد مجرمانہ سرگرمیوں کو روکنا اور معاشرے کو منشیات کے استعمال کے تباہ کن اثرات سے بچانا ہے۔
یہ بھی پڑھیں: اننت ناگ کے سیاحتی مقام چھتہ پل اور ژوہر ناگ کے درمیان گنڈولہ لگانے کی مانگ - GANDOLA BETWEEN CHATTAPAL
اننت ناگ پولیس شہریوں پر زور دیتی ہے کہ وہ منشیات سے پاک معاشرے کی تعمیر میں ان کی کوششوں کا ساتھ دیں اور منشیات سے متعلق جرائم میں ملوث افراد کے خلاف سخت قانونی کارروائی کرنے کے اپنے عزم کا اعادہ کریں۔
