نئی دہلی: مرکزی حکومت پہلگام میں دہشت گردانہ حملے کے تناظر میں جمعرات کو آل پارٹی میٹنگ کرے گی۔ سرکاری ذرائع نے یہ اطلاع دی۔ انہوں نے کہا کہ اس بات کا امکان ہے کہ وزیر دفاع راج ناتھ سنگھ اس میٹنگ کی صدارت کریں گے۔
ذرائع کے مطابق مرکزی وزیر داخلہ امت شاہ اور سنگھ اس معاملے پر مختلف سیاسی جماعتوں کے لیڈروں سے بات کر رہے ہیں۔ کانگریس سمیت مختلف اپوزیشن جماعتوں نے مطالبہ کیا تھا کہ حکومت اس معاملے پر تمام جماعتوں کی میٹنگ بلائے۔
An all-party meeting will be convened tomorrow on the terror attack-related situation. Home Minister Amit Shah and Defence Minister Rajnath Singh are speaking to all parties: Sources#PahalgamTerroristAttack pic.twitter.com/2lM6TFxw5H
— ANI (@ANI) April 23, 2025
امکان ہے کہ راجناتھ سنگھ مختلف پارٹیوں کے لیڈروں کو اس وحشیانہ دہشت گردانہ حملے کی پوری معلومات دیں گے۔ سیاحوں کو نشانہ بنانے والے اس حملے میں کم از کم 26 افراد اپنی جان سے ہاتھ دھو بیٹھے۔ بدھ کی شام، وزیر اعظم نریندر مودی نے طویل عرصے میں عام شہریوں کو نشانہ بنانے والے بدترین دہشت گردانہ حملے کے تناظر میں کابینہ کمیٹی برائے دفاع کی میٹنگ کی صدارت کی۔
دوسری جانب جموں و کشمیر کے وزیر اعلیٰ نے بھی دہشت گردانہ حملے کے ممکنہ نتائج پر غور کرنے کے لیے آل پارٹی میٹنگ بلائی ہے۔
دریں اثنا، جموں و کشمیر کے وزیر اعلیٰ عمر عبداللہ نے بدھ کو کہا کہ انہوں نے پہلگام دہشت گردانہ حملے کے ممکنہ نتائج پر تبادلہ خیال کے لیے ایک آل پارٹی میٹنگ بلائی ہے۔ اس حملے میں 26 افراد ہلاک اور 12 زخمی ہوئے تھے۔
عبداللہ نے ایکس پر ایک پوسٹ میں کہا، "پہلگام میں حملے کے بعد، میں نے دوپہر ایک آل پارٹی میٹنگ بلائی ہے۔ میں نے تمام بڑی سیاسی جماعتوں، جموں و کشمیر کے تمام معزز ممبران پارلیمنٹ اور جموں و کشمیر اسمبلی میں اپوزیشن لیڈر کو دعوت نامے بھیجے ہیں۔" یہ اجلاس جمعرات کو شیر کشمیر انٹرنیشنل کانفرنس سنٹر میں ہوگا۔
