نئی دہلی: بھارت نے اتوار کے روز 300 سے زیادہ بھارتی شہریوں کو ایران سے نکال لیا۔ وزارت خارجہ نے بتایا کہ ایران اور اسرائیل کے درمیان جنگ اور تین ایرانی جوہری مقامات پر امریکی بمباری کے بعد بڑھتی ہوئی کشیدگی کے دوران 311 بھارتی، ایرانی شہر مشہد سے خصوصی پرواز کے ذریعہ دہلی پہنچے۔
انخلاء کی تازہ کاروائی کے بعد ایران سے ملک واپس آنے والوں کی تعداد اب 1,428 ہوگئی۔ وزارت خارجہ کے ترجمان رندھیر جیسوال نے بتایا کہ 311 بھارتی شہری 22 جون کو مشہد سے 1630 بجے ایک خصوصی پرواز سے نئی دہلی پہنچے۔
انہوں نے کہا کہ ایران سے اب تک کل 1428 بھارتی شہریوں کو نکالا جا چکا ہے۔ بھارت نے دونوں ممالک کے درمیان بڑھتی ہوئی کشیدگی کے پیش نظر ایران اور اسرائیل سے بھارتیوں کو واپس لانے کے لیے گزشتہ ہفتے آپریشن سندھو شروع کیا تھا۔ ایک ہفتہ قبل جنگ شروع ہونے کے بعد سے اسرائیل اور ایران نے ایک دوسرے کے شہروں اور فوجی و اسٹریٹجک تنصیبات پر سینکڑوں میزائل اور ڈرون فائر کیے ہیں۔
اتوار کی صبح تین بڑے ایرانی جوہری تنصیبات پر امریکی بمباری کے بعد کشیدگی میں زبردست اضافہ ہوگیا۔ بھارت نے بدھ کے روز سے ایرانی شہر مشہد، آرمینیا کے دارالحکومت یریوان اور ترکمانستان کے دارالحکومت اشک آباد سے چارٹرڈ پروازوں کے ذریعے اپنے شہریوں کو نکال لیا ہے۔
ایران نے مشہد سے تین چارٹرڈ پروازوں کی سہولت کے لیے جمعہ کے روز فضائی حدود کی پابندیاں ہٹا دیں۔ پہلی پرواز جمعہ کو دیر گئے نئی دہلی میں 290 بھارتیوں کے ساتھ اور دوسری پرواز ہفتہ کی سہ پہر 310 ہندوستانیوں کے ساتھ قومی دارالحکومت پہنچی تھی۔
یہ بھی پڑھیں: پی ایم مودی نے ایرانی صدر پیزشکیان سے بات کی - PM MODI SPEAKS TO IRANIAN PRESIDENT
جمعرات کو آرمینیا کے دارالحکومت یریوان سے ایک اور پرواز نئی دہلی پہنچی تھی، اسی طرح اشک آباد سے انخلاء کی ایک خصوصی پرواز ہفتے کی صبح نئی دہلی پہنچی تھی۔
