نئی دہلی: ایئر انڈیا نے احمد آباد کے حالیہ طیارہ حادثے کے بعد اپنی احمد آباد-لندن گیٹوک روٹ کی پرواز نمبر "AI 171" کو بند کرنے کا فیصلہ کیا ہے۔ یہ فیصلہ حادثے میں ہلاک ہونے والے 242 مسافروں اور عملے کے ارکان کے احترام میں کیا گیا، جن میں سے صرف ایک شخص زندہ بچ سکا۔ یہ حادثہ ٹیک آف کے فوراً بعد پیش آیا جب بوئنگ 787-8 ڈریم لائنر احمد آباد کے سردار ولبھ بھائی پٹیل بین الاقوامی ہوائی اڈے سے لندن گیٹوک ہوائی اڈے کے لیے پرواز کر رہا تھا۔
ہوائی جہاز کے سنگین یا مہلک حادثے کے بعد فلائٹ نمبر کے استعمال کو ختم کرنا ایئر لائنز میں ایک عام رواج ہے۔ اس کا مقصد مرنے والوں کے اہل خانہ اور مسافروں کے جذبات کا احترام کرنا ہوتا ہے۔ اس سلسلے میں ایئر انڈیا نے اب اپنی احمد آباد-لندن گیٹوک فلائٹ نمبر کے لیے "AI 171" کے بجائے "AI 159" کا استعمال شروع کر دیا ہے۔ ساتھ ہی واپسی کی پرواز کا نمبر ’’AI 160‘‘ رکھا گیا ہے۔ بکنگ سسٹم میں ضروری تبدیلیاں 17 جون سے نافذ کر دی گئی ہیں۔
اسی طرح ایئر انڈیا ایکسپریس نے بھی اپنی فلائٹ نمبر "IX 171" کو ہٹانے کا فیصلہ کیا ہے۔ اس قدم کو حادثے میں مرنے والوں کے تئیں احترام اور حساسیت کی علامت سمجھا جاتا ہے۔ یہ طریقہ پہلے بھی اپنایا گیا ہے، جیسے 2020 میں کوزی کوڈ طیارے کے حادثے کے بعد، ایئر انڈیا ایکسپریس نے متعلقہ فلائٹ نمبر کا استعمال کرنا بند کر دیا تھا۔ اس قسم کے اقدام کے ساتھ، ایئر لائنز حادثات کا شکار ہونے والے خاندانوں کے لیے ہمدردی اور احترام کا پیغام دیتی ہیں۔
مزید پڑھیں:
احمدآباد طیارہ حادثہ: پائلٹ کا آخری پیغام، 'کوئی پاور نہیں... کوئی تھرسٹ نہیں... نیچے جا رہا'
کریش طیارہ کا بلیک باکس برآمد، کھلےگا حادثے کا راز، بلیک باکس کا تجزیہ کیوں ضروری ہوتا ہے؟
