ఇది నాకు కొత్త మ్యాచ్ కాదు - జూబ్లీహిల్స్లో ఈసారి నాదే విన్ : అజారుద్దీన్
Mohammad Azharuddin Election Campaign at Jubilee Hills : శాసనసభ ఎన్నికల్లో జూబ్లీహిల్స్ నుంచి తన గెలుపు ఖాయమని టీమిండియా మాజీ కెప్టెన్ మహమ్మద్ అజారుద్దీన్ ధీమా వ్యక్తం చేశారు. ఇది తనకు కొత్త మ్యాచ్ కాదని.. తాను ఇంతకు ముందు కూడా రెండుసార్లు ఎన్నికల్లో పోటీ చేశానని తనకు ఇష్టమైన క్రికెట్ పరిభాషలోనే తెలిపారు. జూబ్లీహిల్స్లో తనకు వస్తున్న స్పందన అత్యద్భుతంగా ఉందన్నారు. జూబ్లీహిల్స్ నియోజకవర్గంలోని యూసుఫ్గూడలో ఎన్నికల ప్రచారంలో భాగంగా ఆయన ఇంటింటికీ వెళ్లి ఓట్లను అభ్యర్థించారు.
Azharuddin Election Campaign : బీఆర్ఎస్ తొమ్మిదేళ్ల పాలనలో అభివృద్ధి ఏమీ చేయలేదని అజారుద్దీన్ విమర్శించారు. బీఆర్ఎస్ నాయకులు బంగారు తెలంగాణ అంటున్నారని.. వారు అంటున్నట్లుగా తెలంగాణ ఎక్కడా బంగారు తెలంగాణ కాలేదని మండిపడ్డారు. ఈ క్రమంలోనే జూబ్లీహిల్స్ ధనవంతులు ఉండే ప్రాంతమని అందరూ అనుకుంటారు కానీ.. ఈ రోడ్డు పక్కన చాలా మంది పేదవారు ఉంటారని ఆవేదన వ్యక్తం చేశారు. తన దృష్టిలో అభివృద్ధి అంటే పెద్ద పెద్ద భవనాలు కట్టడం, పెద్ద వ్యక్తులను తీసుకురావడం కాదని.. పేద ప్రజలకు ఇళ్లు, నిరుద్యోగులకు ఉద్యోగాలు ఇవ్వడమే నిజమైన అభివృద్ధి అన్నారు.
