ganja cultivation in Hyderabad : ఏం తెలివి బాసూ.. ఇంట్లోనే గంజాయి మొక్కల సాగు

ganja cultivation at home in Hyderabad : హైదరాబాద్​లోని వనస్థలిపురం పోలీస్​ స్టేషన్​ పరిధిలో ఇంటి ఆవరణలో గంజాయి సాగు చేస్తున్న వ్యక్తిని పోలీసులు అదుపులోకి తీసుకున్నారు. గాంధీనగర్​లో ఇంటి ఆవరణలో గంజాయి మొక్కలు పెంచుతున్నట్లు హైదరాబాద్​ ఎస్​ఓటీ పోలీసులకు స్థానికులు సమాచారం అందించారు. ఘటనాస్థలికి చేరుకున్న పోలీసులు గంజాయి మొక్కలు పెంచుతున్న సాయి రేవంత్​ అనే వ్యక్తిని అదుపులోకి తీసుకున్నారు. 

పశ్చిమ గోదావరికి చెందిన సాయి రేవంత్​ గత రెండేళ్లుగా వనస్థలిపురంలోని ఓ ఇంట్లో అద్దెకు ఉంటున్నాడు. గంజాయికి అలవాటు పడిన రేవంత్ ఇంటి ఆవరణలోనే గంజాయి సాగు చేయడం ప్రారంభించాడని పోలీసులు తెలిపారు. ఇంటి ఆవరణలో కూరగాయలు, వివిధ రకాల పూల మొక్కలతో పాటు గంజాయి మొక్కలు పెంచుతున్నట్లు వెల్లడించారు. రేవంత్​ను అదుపులోకి తీసుకున్న ఎస్​ఓటీ పోలీసులు అతడి నుంచి10 గంజాయి మొక్కలు, 3 గంజాయి విత్తన ప్యాకెట్లు, 300 గ్రాముల గంజాయి స్వాధీనం చేసుకుని స్థానిక పోలీసులకు అప్పగించారు.