మధిర ప్రజలను బీఆర్ఎస్ నేతలు కొనలేరు - ఎంతమంది వచ్చినా నన్ను ఓడించలేరు : భట్టి
Bhatti Vikramarka Fires on CM KCR : ఖమ్మం జిల్లా మధిర నియోజకవర్గం ముదిగొండ మండలం బాణాపురంలో సీఎల్పీ నేత, కాంగ్రెస్ అభ్యర్థి భట్టి విక్రమార్క ఎన్నికల ప్రచారం నిర్వహించారు. ఈ సందర్భంగా ముఖ్యమంత్రి కేసీఆర్ కాంగ్రెస్ కావాలా..? కరెంటు కావాలా అని మాట్లాడుతున్నారని.. కాంగ్రెస్ ఉండబట్టే కరెంట్ ఉందని పేర్కొన్నారు. సీఎం స్థాయిలో ఉన్న వ్యక్తి అలాంటి మాటలు మాత్రం సరికాదని.. ఇందిరమ్మ రాజ్యం అంటే ఇల్లు లేని వారికి ఇల్లు ఇవ్వడం, అట్టడుగు స్థాయిలో ఉన్న వారిని పైకి తీసుకురావడమే అని తెలిపారు. గజ్వేల్‌ వదిలి కామారెడ్డికి పోయిన కేసీఆర్ ఓడిపోవడం ఖాయమన్నారు.
70కి పైగా కాంగ్రెస్ అభ్యర్థులు గెలుస్తారని.. మధిర ప్రజలను బీఆర్ఎస్ నేతలు కొనలేరని భట్టి పేర్కొన్నారు. ఎంతమంది నేతలు వచ్చినా.. తనను ఓడించలేరని ధీమా వ్యక్తం చేశారు. ప్రజల సమస్యల పరిష్కారం కోసం రాష్ట్రమంతా తిరిగానని.. కేసీఆర్‌లాగా తాను ఫామ్‌హౌస్‌లో పడుకోలేదని దుయ్యబట్టారు. ప్రజల సమస్యలకు పరిష్కారం కోసమే ఆరు గ్యారంటీలు పెట్టామని చెప్పారు. ప్రభుత్వం ఏర్పడిన తర్వాత 100 రోజుల్లోనే అమలు చేస్తామని స్పష్టం చేశారు.
