ఓ ద్విచక్రవాహనంలోకి పాము పిల్ల దూరి కాసేపు అందరినీ హైరానా పడేలా చేసింది. యాదాద్రి భువనగిరి జిల్లా కేంద్రంలోని కిసాన్నగర్లో ఓ పాలడైరీలోకి ఓ పాము పిల్ల వచ్చింది. డైరీ యజమాని శ్రీను దాన్ని గమనించి వెంటనే.. పాములు పట్టే వారికి సమాచారం అందించాడు. హుటాహుటిన ఘటనాస్థలికి చేరుకున్న పాములు పట్టే వ్యక్తి సూర్య... రాళ్లలో దాకున్న పామును పట్టుకునేందుకు ప్రయత్నించాడు. ఈ క్రమంలోనే పాము తోకను పట్టుకోగా అది తెగిపోయింది.
చేతికి దొరికినట్టే దొరికి జారిపోయిన పాము... నేరుగా దాన్ని పట్టుకునేందుకు వచ్చిన సూర్య ద్విచక్రవాహనంలోకే దూరింది. సూర్య తన బైక్ను సమీపంలోని మెకానిక్షాప్ దగ్గరికి తీసుకెళ్లాడు. మెకానిక్ సాయంతో ఒక్కో పార్టు విప్పి చూశాడు. బైక్ పార్టులన్ని విప్పదీసాక గానీ.. పాము కనిపించలేదు. పెట్రోల్ ట్యాంక్ కింద ఉన్న పాము పిల్ల చివరికి బైక్ను వదిలి నేలపై పడింది. కిందపడ్డదాన్ని పట్టుకునేందుకు ప్రయత్నించిన సూర్యను కొంత ఊరుకులు పరుగులు పెట్టించింది. ఎట్టకేలకు సూర్య తన చాకచక్యంతో పామును పట్టుకున్నాడు. దీంతో అందరూ ఊపిరి పీల్చుకున్నారు. దాదాపు గంటకు పైగా అందరినీ ఆ పాము పిల్ల ఆగం చేసింది.
ఇదీ చూడండి:
