మెడిసిన్ ఫ్రమ్ ది స్కై(Medicine From the Sky) ప్రాజెక్టు పేరిట కార్యక్రమం అమలు చేయగా... అత్యవసర పరిస్థితుల్లో ఈ డ్రోన్ల ద్వారా ఎన్నో ఉపయోగాలు ఉన్నాయని మంత్రి కేటీఆర్ వ్యాఖ్యానించారు. డ్రోన్ల వినియోగంతో లెక్కలేనన్ని ఉపయోగాలు ఉన్నాయన్న మంత్రి కేటీఆర్(ktr).. రాష్ట్రంలో మరిన్ని కార్యక్రమాల కోసం డ్రోన్లు వినియోగించేందుకు వీలుగా ప్రయోగాలు చేస్తున్నట్లు తెలిపారు. సాంకేతిక వినియోగంపై సీఎం కేసీఆర్ ఆరా తీస్తారని అన్నారు. సామాన్యుడికి ఉపయోగంలేని సాంకేతికత వ్యర్థమని సీఎం చెబుతారని పేర్కొన్నారు. రెండేళ్ల కిందటే దావోస్‌లో ఈ కార్యక్రమానికి శ్రీకారం చుట్టామని చెప్పారు.
మైనింగ్ లాంటి అక్రమాలకు పాల్పడే ప్రాంతాలను కట్టడి చేయొచ్చు. బేగంపేట విమానాశ్రయాన్ని ఏరోస్పేస్ శిక్షణ కేంద్రంగా తీర్చిదిద్దాలి. బేగంపేట విమానాశ్రయాన్ని ఏవియేషన్ వర్సిటీగా మార్చాలి. త్వరలో వికారాబాద్ కొత్త కలెక్టరేట్‌ను సీఎం ప్రారంభిస్తారు.
- ఐటీ, పరిశ్రమల శాఖల మంత్రి కేటీఆర్
ఎమర్జింగ్ టెక్నాలజీని ఎంతో ప్రోత్సహిస్తున్నామని మంత్రి కేటీఆర్ తెలిపారు. అధునాతన టెక్నాలజీతో మందులను సరఫరా చేస్తున్నామని పేర్కొన్నారు. అత్యవసర పరిస్థితుల్లో డ్రోన్ల ద్వారా మందులు, రక్తం సరఫరా చేయనున్నట్లు వివరించారు. ఆరోగ్య రంగంలోనే కాదు అనేక రంగాల్లో డ్రోన్ వాడొచ్చని అన్నారు. మహిళల భద్రత కోసం కూడా డ్రోన్లను వాడుతున్నామని గుర్తు చేశారు. అమ్మాయిలను వేధించే వాళ్లు డ్రోన్ చప్పుళ్లకే భయపడతారని వెల్లడించారు.
రెండు సంవత్సరాల కిందట దావోస్‌లో వరల్డ్ ఎకానమిక్ ఫోరమ్ ప్రతినిధులు మనల్ని అడిగారు. ముఖ్యమంత్రి కేసీఆర్(cm kcr) నాయకత్వంలో తెలంగాణ చాలా పురోగమనశీల రాష్ట్రంగా పేరు తెచ్చుకుంది. మరి ఈ రాష్ట్రంలో ఇలాంటి కొత్త ప్రయోగాలు చేస్తే భారతదేశానికే మీరు ఆదర్శంగా నిలబడతారు. మీరెందుకు ప్రయత్నం చేయకూడదని అడిగారు. మేమందరం అక్కడే ఒప్పుకున్నాం. రెండేళ్ల తర్వాత అయినా ఈ కొవిడ్(covid) వల్ల కొంత జాప్యం జరిగినప్పటికీ ఈ మూడు డ్రోన్ స్టార్టప్స్‌తో ఈ కార్యక్రమం చేయడం సంతోషంగా ఉంది. ఇక్కడ డ్రోన్ టేకాఫ్ అయ్యి... అందులో మనకు కావాల్సిన వ్యాక్సిన్‌, కావాల్సిన మందులను, అవసరమైతే రక్తాన్ని కూడా తీసుకొని ఏ ట్రాఫిక్ సమస్య లేకుండా ఐదు నిమిషాల్లో ఆరు కిలోమీటర్ల దూరంలో ఉన్న ప్రైమరీ హెల్త్ కేర్ సెంటర్‌కు పోయి... అక్కడ ల్యాండ్ అయింది ఇప్పుడే. అక్కడ ఉండే డాక్టర్లు, నర్సులు ఆ మందులు తీసుకొని పేషెంట్లకు ఇవ్వొచ్చు. అవసరమైతే కొండలు, గుట్టలు, రోడ్లు లేని ప్రదేశాలకు కూడా అత్యవసర పరిస్థితుల్లో రక్తం చేరవేయాల్సి వచ్చినా... ఇవన్నీ కూడా ఇట్లాంటి అధానాతనమైన సాంకేతికపరిజ్ఞానం ద్వారా చేరవేయడానికి ఈ రోజు తెలంగాణ భారతదేశానికే ఆదర్శంగా నిలబడుతోంది.
- ఐటీ, పరిశ్రమల శాఖల మంత్రి కేటీఆర్
దేశంలో తొలిసారి రాష్ట్రంలో డ్రోన్ల ద్వారా ఔషధాల సరఫరా చేసే ప్రాజెక్టును వికారాబాద్‌లో ప్రారంభించారు. కేంద్రమంత్రి జ్యోతిరాదిత్య సింధియా... డ్రోన్‌లో ఔషధాల బాక్సులను పెట్టగా.... 3 డ్రోన్లలో ప్రయోగాత్మకంగా మందులు, టీకాలను మంత్రులు పంపించారు. ఔషధాలను 2 కి.మీ. దూరంలో ఉన్న వికారాబాద్ ప్రాంతీయ ఆస్పత్రికి డ్రోన్ విజయవంతంగా డెలివరీ చేసింది. సరఫరా చేసిన అనంతరం తిరిగి డ్రోన్ వేదిక వద్దకు చేరుకుంది.
రెండేళ్ల కిందట ఓ ప్రయత్నం చేశాం. డ్రోన్లు ఎట్లా వాడొచ్చు. మహిళల్ని, పిల్లల్ని సురక్షితంగా ఉంచడానికి ఒక ప్రయత్నం చేస్తే అందులో ఇద్దరు అమ్మాయిలు మంచి ప్రొడక్ట్‌తో వచ్చారు. ఆ ప్రొడక్ట్ ఏమిటంటే ఒకవేళ అమ్మాయిని ఎవరైనా వేధిస్తున్నారనుకోండి. ఎవరైనా ఇబ్బంది పెడుతున్నారు అనుకోండి. మన రంగారెడ్డి జిల్లాలోనే దిశ ఘటన జరిగింది. అలాంటి పరిస్థితి ఎవరైనా అమ్మాయికి జరిగితే వెంటనే తన ఫోన్లో ఒక బటన్ నొక్కితే చాలు... ఈ డ్రోన్ ఒక సైరన్ పెట్టుకోని, ఒక కెమెరా పెట్టుకోని ఆ ప్రాంతానికి వచ్చినట్లయితే వెంటనే ఆ చప్పుడుకే వాళ్లు పారిపోయే పరిస్థితి ఉంటది. లేదా ఆ జరుగుతున్న సంఘటనని కెమెరా రికార్డు చేస్తే నేరం జరగకుండా అరికట్టే అవకాశం ఉంటది. డ్రోన్ల వల్ల లెక్కలేనన్ని లాభాలు ఉన్నాయి.
- ఐటీ, పరిశ్రమల శాఖల మంత్రి కేటీఆర్
ఇదీ చదవండి: Medicine from the sky : వికారాబాద్‌లో మెడిసిన్ ఫ్రమ్ ది స్కై ప్రాజెక్టు ప్రారంభం
