Harish Rao Comments: రంగారెడ్డి జిల్లా షాద్నగర్లో 100 పడకల ఆసుపత్రి కోసం మంత్రి హరీశ్రావు శంకుస్థాపన చేశారు. 21 కోట్ల రూపాయలతో చేపట్టిన ఈ ఆసుపత్రిని ఏడాదిలోగా పూర్తి చేస్తామని ఆయన హామీ ఇచ్చారు. తెరాస లేకపోతే తెలంగాణ వచ్చేదా అని మంత్రి హరీశ్ ప్రశ్నించారు. తెలంగాణ రాకపోతే వారికి బండి సంజయ్కు అధ్యక్ష పదవి వచ్చేదా? అంటూ ప్రశ్నించారు. అధికారం కోసమే కాంగ్రెస్, భాజపా నేతలు ఆరాటపడుతున్నారని.. తెలంగాణను అభివృద్ధి చేసేందుకు కాదని ఆయన విమర్శించారు.
రాయచూర్ ఎమ్మెల్యే రైతుబంధు, రైతుబీమా, 24 గంటల విద్యుత్ లాంటి పథకాలను తమ నియోజకవర్గంలో అమలు చేయాలని డిమాండ్ చేశారని... లేకుంటే నియోజకవర్గాన్ని తెలంగాణలో కలిపేస్తామని హెచ్చరించారన్నారు. తెలంగాణ రాక ముందు తలసరి ఆదాయం లక్షా 24 వేల రూపాయలు ఉండేదని.. ఏడేండ్లలో కేసీఆర్ నాయకత్వంలో 2లక్షల 78వేల రూపాయలతో దేశంలో నంబర్ వన్ స్థానంలో ఉందన్నారు. తలసరి ఆదాయంలో తెలంగాణ అగ్రగామిగా నిలిచిందన్నారు. దక్షిణ భారత్లో 7 రాష్ట్రాల కంటే జీఎస్డీపీలో రాష్ట్రాన్ని సీఎం కేసీఆర్ మొదటి స్థానంలో నిలిపారని ఆయన అన్నారు. ఈ దేశంలో రైతులకు ఉచిత విద్యుత్ ఏ రాష్ట్రంలోనైనా ఇస్తున్నారా అని ప్రశ్నించారు. బండి సంజయ్ పాదయాత్ర చేస్తూ పిచ్చిపిచ్చిగా మాట్లాడుతున్నారని ఆయన విమర్శించారు. ఇటీవల రాష్ట్రానికి వచ్చిన కేంద్ర మంత్రి నితిన్ గడ్కరీ కాళేశ్వరం ప్రాజెక్టు అద్భుతమని ప్రశంసించారని వెల్లడించారు.
వచ్చే ఆరేడు నెలల్లో పాలమూరు ప్రాజెక్టు పూర్తి చేసి నీళ్లు పారిస్తామని మంత్రి హరీశ్ అన్నారు. ఈ ఏడాదిలోనే పాలమూరు ప్రాజెక్టును పూర్తి చేసి వేల ఎకరాలకు సాగునీరు అందిస్తామని ఆయన హామీ ఇచ్చారు. రేపో మాపో లక్ష్మీదేవి పల్లి ప్రాజెక్టును కూడా తీసుకొస్తామన్నారు. పాలమూరు ప్రాజెక్టును ఆపేందుకు కాంగ్రెస్, భాజపా నేతలు అడ్డంకులు సృష్టిస్తున్నారని మంత్రి ఆరోపించారు. డిక్లరేషన్ల పేరిట కాంగ్రెస్ నేతలు ప్రజలను మోసం చేయాలని చూస్తున్నారని ఆయన విమర్శించారు. చత్తీస్గఢ్లో కాంగ్రెస్ పార్టీనే అధికారంలో ఉందని.. అక్కడ ఎందుకు అభివృద్ధి జరగడం లేదని మంత్రి హరీశ్ ప్రశ్నించారు.
ఇవీ చదవండి:
