మహబూబాబాద్ జిల్లా కేంద్రంలో బుధవారం నాడు జరిగిన ఓ వివాహ వేడుకలో మరోసారి బుల్లెట్ బండి పాట వైరల్ అయింది. ఈ పాటకు మహబూబాబాద్ ఎంపీ మాలోత్ కవిత డ్యాన్స్ చేశారు. స్టేజీపై పెళ్లి కూతురు, పెళ్లి కుమారుడు, వారి కుటుంబ సభ్యులతో కలిసి నృత్యం చేశారు. నృత్యం చేసిన వీడియోలు సామాజిక మాధ్యమాల్లో వైరల్గా మారాయి. గత కొద్ది రోజులుగా సామాజిక మాధ్యమాల్లో 'బుల్లెట్ బండి' పాట తెగ వైరల్ అవుతోంది.
ఈనెల 14న మంచిర్యాల జిల్లా జన్నారానికి చెందిన అటవీ శాఖ ఉద్యోగి రాము, సురేఖ దంపతుల పెద్ద కూతురు సాయి శ్రియకు రామక్రిష్ణాపూర్కు చెందిన ఆకుల అశోక్తో వివాహం జరిపించారు. పెళ్లి బరాత్లో వధువు చేసిన డ్యాన్స్ చూసి ప్రముఖులు కూడా ఈ వీడియోను షేర్ చేసి వధూవరులను ఆశీర్వదిస్తున్నారు. గాయని మోహన భోగరాజు ఆలపించిన ఈ ‘బుల్లెట్ బండి...’ పాటకు నవ వధువు వేసిన స్టెప్పుల వీడియోను మధ్యప్రదేశ్‌లో మార్క్‌ఫెడ్‌ ఎండీగా పని చేస్తున్న రామగుండానికి చెందిన ఐఏఎస్‌ అధికారి పి.నరహరి ట్వీట్‌ చేశారు.
స్వాతంత్య్ర దినోత్సవ సంబురాల్లో భాగంగా.. బుల్లెట్ బండి పాటకు ఓ నర్సు చేసిన డ్యాన్స్ ఇప్పుడు ట్రెండ్ అవుతోంది. రాజన్న సిరిసిల్ల జిల్లా తంగళ్లపల్లి ప్రాథమిక ఆరోగ్య కేంద్రం (PHC)లోని కారిడార్లో ఈ వీడియో తీసినట్లుగా తెలిసింది. పాటకు తగ్గట్టుగా సదరు నర్సు చేసిన డ్యాన్స్ వైరల్ అయింది. పాటకు తగ్గ హావభావాలు ప్రదర్శించి తీరు నెటిజన్లను ఆకట్టుకుంది. తాజాగా ఎంపీ కూడా బుల్లెట్ బండి పాటపై నృత్యం చేశారు.
ఇదీ చదవండి: 1న కేఆర్‌ఎంబీ భేటీకి తెలంగాణ హాజరు... అధికారులకు సీఎం దిశానిర్దేశం
