నేటి నుంచి సీఎం కేసీఆర్ మూడో విడత ఎన్నికల ప్రచారం - ఇవాళ దమ్మపేట, బూర్గంపాడు, నర్సంపేట సభలకు హాజరు
నేటి నుంచి సీఎం కేసీఆర్ మూడో విడత ఎన్నికల ప్రచారం - ఇవాళ దమ్మపేట, బూర్గంపాడు, నర్సంపేట సభలకు హాజరు
CM KCR Public Meetings Today : ఎన్నికల ప్రచారంలో భాగంగా భద్రాద్రి కొత్తగూడెం, వరంగల్ జిల్లాల్లో బీఆర్ఎస్ అధినేత, ముఖ్యమంత్రి కేసీఆర్ మూడో విడత ప్రజా ఆశీర్వాద సభలకు గులాబీ శ్రేణులు ముమ్మర ఏర్పాట్లు చేస్తున్నాయి. నేడు పినపాక, భద్రాచలం, అశ్వారావుపేట, నర్సంపేట నియోజకవర్గాలు కలిపి.. బూర్గంపాడు, దమ్మపేట, నర్సంపేటలో ప్రజా ఆశీర్వాద సభల్లో సీఎం పాల్గొననున్నారు. కేసీఆర్ పాల్గొననున్న భారీ బహిరంగ సభలను విజయవంతం చేసేందుకు.. 4 నియోజకవర్గాల్లో బీఆర్ఎస్ అభ్యర్థులు, నేతలు ప్రతిష్టాత్మకంగా తీసుకుని సభలకు ఏర్పాట్లు చేస్తున్నారు.
CM KCR Public Meetings Today : నామినేషన్ల ఘట్టం, దీపావళి పండుగ పూర్తి కావడంతో.. ఇక నేటి నుంచి ముఖ్యమంత్రి కేసీఆర్.. ప్రచారం ఆఖరి రోజు వరకు నిర్విరామంగా ప్రజా ఆశీర్వాద సభల్లో పాల్గొననున్నారు. రెండు రోజులు మినహా.. మిగిలిన రోజుల్లో నాలుగు, మూడు నియోజకవర్గాలను సీఎం చుట్టేయనున్నారు. అసెంబ్లీ ఎన్నికల ప్రచార పర్వంలో భాగంగా ముఖ్యమంత్రి కేసీఆర్ రాష్ట్రవ్యాప్తంగా నిర్వహిస్తున్న ప్రజా ఆశీర్వాద బహిరంగ సభల్లో భాగంగా ఇవాళ ఉమ్మడి ఖమ్మం జిల్లాలో రెండు బహిరంగ సభల్లో పాల్గొననున్నారు. పినపాక, భద్రాచలం, అశ్వారావుపేట నియోజకవర్గాల బీఆర్ఎస్(BRS) అభ్యర్థులు రేగా కాంతారావు, తెల్లం వెంకట్రావు, మెచ్చా నాగేశ్వరరావుకు మద్దతుగా.. రెండు బహిరంగ సభల్లో సీఎం పాల్గొంటారు.
KCR Praja Ashirvada Sabha in Warangal : కేసీఆర్ తొలుత అశ్వారావుపేట ప్రజా ఆశీర్వాద సభలో పాల్గొని ప్రసంగిస్తారు. ఈ సభ కోసం దమ్మపేట సమీపంలోని ఖాళీ స్థలంలో బహిరంగ సభకు ఏర్పాట్లు చకచకా సాగుతున్నాయి. మధ్యాహ్నం నేరుగా సభా ప్రాంగణంలో ఏర్పాటు చేసిన ప్రత్యేక హెలికాప్టర్లో కేసీఆర్ దిగి బహిరంగ సభలో పాల్గొంటారు. అశ్వారావుపేట సభ అనంతరం.. పినపాక, భద్రాచలం నియోజకవర్గాలకు కలిపి బూర్గంపాడు మండలం లక్ష్మీపురంలో ఏర్పాటు చేసిన సభలో సీఎం పాల్గొంటారు. ఈ సభలకు భారీగా జనసమీకరణ చేసేలా ఏర్పాట్లు గులాబీ శ్రేణులు చేస్తున్నారు. ఇప్పటికే మూడు నియోజకవర్గాల్లోని అన్ని మండలాల్లో ముఖ్యమంత్రి సభలకు సన్నాహక సమావేశాలు ఏర్పాటు(CM KCR Meeting Arrangements) చేసి జనసమీకరణపై ముమ్మర కసరత్తులు పూర్తి చేశారు.
KCR Praja Ashirvada Sabha at Lakshmipuram : బహిరంగ సభకు రెండు నియోజకవర్గాల నుంచి భారీగా కార్యకర్తల్ని సమీకరించి సత్తా చాటేందుకు.. గులాబీ పార్టీ నేతలు చకచకా ఏర్పాట్లు చేస్తున్నారు. పినపాక, భద్రాచలం అభ్యర్థులు రేగా కాంతారావు, తెల్లం వెంకట్రావుతో పాటు ఎంపీలు రవిచంద్ర, నామా నాగేశ్వరరావు, ఎమ్మెల్సీ తాతా మధుసూదన్ ఆధ్వర్యంలో సభకు హాజరయ్యే కార్యకర్తలకు ఇబ్బందులు లేకుండా విస్తృతంగా ఏర్పాట్లు చేస్తున్నారు. బహిరంగ సభల దృష్ట్యా పోలీసు శాఖ భారీ బందోబస్తు చర్యలు చేపట్టింది. సభా ప్రాంగణాలను భద్రాద్రి జిల్లా ఎస్పీ వినీత్ పలుమార్లు ఏర్పాట్లను పర్యవేక్షించారు. హెలిప్యాడ్ నుంచి.. సీఎం కాన్వాయ్ వెళ్లే మార్గాల్లో భారీ బందోబస్తు ఏర్పాటు చేయాలని.. ఆదేశాలు జారీ చేశారు.
CM KCR Public Meeting Arrangements in Narsampet : దమ్మపేట, బూర్గంపాడ్‌లలో ప్రజా ఆశీర్వాద సభ(KCR Praja Ashirvada Sabha)లు అనంతరం.. సాయంత్రం ముఖ్యమంత్రి నర్సంపేటలో జరిగే సభలో పాల్గొననున్నారు. ఉమ్మడి వరంగల్ జిల్లాలో జనగామ, మహబూబూబాద్, వర్ధన్నపేట నియోజకవర్గాల తర్వాత నిర్వహించబోయే నాలుగో సభ ఇది. నర్సంపేట నియోజకవర్గ ఎమ్మెల్యే, బీఆర్ఎస్ అభ్యర్థి పెద్ది సుదర్శన రెడ్డి.. సభా ఏర్పాట్లను దగ్గరుండీ పర్యవేక్షిస్తున్నారు. పట్టణంలో సర్వాపురం మైదానంలో ఈ సభకు ఏర్పాట్లు చేశారు. నర్సంపేట.. పరిసర గ్రామాల నుంచి దాదాపు 80 వేల నుంచి లక్ష వరకు జనం ఈ సభకు హాజరవుతారని భావిస్తున్నారు.
