Karimnagar Granite Issue : మరోసారి కరీంనగర్ గ్రానైట్ వ్యవహారం చర్చనీయాంశంగా మారింది. గ్రానైట్ రాయల్టీ ఎగవేత అక్రమాలపై నాడు విజిలెన్స్ అండ్ ఎన్ఫోర్స్మెంట్ విభాగం నివేదిక ఇచ్చినప్పటి నుంచి జరిగిన పరిణామాలపై గత ఏడాది జులై 17న కరీంనగర్లోని గనుల శాఖ ఏడీ, రాష్ట్ర గనుల శాఖ డైరెక్టర్కు లేఖ రాశారు. అందులో పలు అంశాలను వివరించారు. ఈ మేరకు ఉమ్మడి కరీంనగర్ జిల్లాలో 8 కంపెనీలకు ఇచ్చిన లీజులు, ఆ కంపెనీలు రైల్వే వ్యాగన్ల ద్వారా, కాకినాడ సీ పోర్టు తదితర ప్రాంతాల నుంచి రవాణా చేసిన, ఎగుమతి చేసిన గ్రానైట్, వీటికి చెల్లించిన సీనరేజి తదితర అంశాలపై అప్పట్లో విజిలెన్స్ అండ్ ఎన్ఫోర్స్మెంట్ విభాగం లోతుగా దర్యాప్తు చేసింది. ఏ రైల్వే స్టాక్ యార్డు నుంచి ఎంత రవాణా చేశారన్న వివరాలనూ సేకరించింది. 7 లక్షల 68 వేల 889.937 క్యూబిక్ మీటర్ల గ్రానైట్ను రాయల్టీ చెల్లించకుండా తరలించినట్లు గుర్తించింది.
Karimnagar Granite Mining Issue : ప్రభుత్వం నిర్ణయించిన ప్రకారం ఈ గ్రానైట్కు రూ.124.94 కోట్ల రాయల్టీ చెల్లించాల్సి ఉందని, అనధికారికంగా తరలించినందున చట్టప్రకారం 5 రెట్లు పెనాల్టీ చెల్లించాల్సి ఉందని.. ఈ పెనాల్టీ 624.72 కోట్లు కలిపి.. మొత్తం 749.66 కోట్లు వసూలు చేయాలని 2013 మే 29న విజిలెన్స్ అండ్ ఎన్ఫోర్స్మెంట్ సిఫార్సు చేసింది. నాడు ఆ నివేదికను పరిశీలించిన పరిశ్రమలు-వాణిజ్య శాఖ.. మైనింగ్ చట్టం ప్రకారం చర్యలు తీసుకోవాలని అదే ఏడాది జులై 20న గనుల శాఖ డైరెక్టర్కు మెమో జారీ చేసింది. దీని ఆధారంగా 8 ఏజెన్సీలకు కరీంనగర్లోని మైనింగ్ ఏడీ నోటీసులు జారీ చేశారు. తర్వాత 7 ఏజెన్సీల్లోని 198 మంది లీజుదారులకు డిమాండ్ నోటీసులు ఇవ్వడంతో పాటు, ఆ ఏజెన్సీలు ఇచ్చిన ఆధారాల్లో కవర్ కాని గ్రానైట్కు సంబంధించి కూడా షోకాజ్ నోటీసులు ఇచ్చారు.
సంబంధిత లీజుదారులకు గ్రానైట్ డిస్పాచ్ పర్మిట్లను నిలిపివేశారు. దీంతో కొందరు లీజుదారులు ప్రభుత్వానికి అప్పీలు చేసుకోగా, సాధారణ సీనరేజి ఛార్జీతో పాటు వన్ టైం పెనాల్టీ విధించి పరిష్కరించిందని లేఖలో వివరించారు. చట్టప్రకారం పెనాల్టీని తగ్గించే అధికారం ప్రభుత్వానికి ఉందన్నారు. రూ.749 కోట్లు వసూలు చేయాల్సి ఉన్నా.. చేయలేదని 2018లో ఒకరు కోర్టుకు వెళ్లారని, దీనిపై కౌంటర్ అఫిడవిట్ దాఖలు చేశామని, విజిలెన్స్ నివేదిక ఆధారంగా చర్యలు తీసుకొన్నామని డైరెక్టర్కు రాసిన లేఖలో వివరించారు.
ఇవీ చూడండి..
