కేసీఆర్ ధరణి కావాలా? కాంగ్రెస్ పట్వారీ వ్యవస్థ కావాలా? : కేటీఆర్
కేసీఆర్ ధరణి కావాలా? కాంగ్రెస్ పట్వారీ వ్యవస్థ కావాలా? : కేటీఆర్
Minister KTR Election Campaign at Kama Reddy : రాష్ట్ర ప్రభుత్వం తీసుకొచ్చిన ధరణి తీసేసి పట్వారీ వ్యవస్థ తెస్తామని కాంగ్రెస్ అంటోందని.. ఒకవేళ ఆ వ్యవస్థను తీసేస్తే ఎలాంటి పరిస్థితులు వస్తాయో మీ అందరికీ బాగా తెసుసని మంత్రి కేటీఆర్ అన్నారు. కేసీఆర్ వచ్చిన తర్వాతనే గ్రామాల్లో ఎక్కడ చూసినా పచ్చదనం కనిపిస్తోందని తెలిపారు. కామారెడ్డిలో నిర్వహించిన రోడ్‌షోలో కేటీఆర్ పాల్గొన్నారు.
Minister KTR Election Campaign at Kama Reddy : సీఎం కేసీఆర్ వచ్చాక రాష్ట్రంలో 24 గంటల కరెంటు వస్తుందని.. గ్రామాల్లో ఎక్కడ చూసినా పచ్చదనం కనిపిస్తోందని బీఆర్‌ఎస్‌ కార్యనిర్వాహక అధ్యక్షుడు, మంత్రి కేటీఆర్(Minister KTR) తెలిపారు. కాంగ్రెస్ పాలనలో ఎక్కడ చూసినా అరాచకమే కనిపించిందని అన్నారు. బీడీ పరిశ్రమలో పనిచేసే మహిళలకు రూ.2 వేలు ఇస్తున్న ప్రభుత్వం తమదని హర్షించారు. కామారెడ్డి జిల్లాలో జరిగిన బీఆర్‌ఎస్‌ రోడ్‌షో(BRS Road Show)లో మంత్రి కేటీఆర్ పాల్గొని.. కాంగ్రెస్ పార్టీపై తీవ్రస్థాయిలో విమర్శలు చేశారు.
తెలంగాణకు సీఎంగా కేసీఆర్ వచ్చాకే రైతుబంధు(Rhythu Bandhu) వచ్చిందని.. 55 ఏళ్లు అధికారంలో ఉన్న కాంగ్రెస్‌కు రైతుబంధు ఆలోచన ఎప్పుడైనా వచ్చిందా అంటూ మంత్రి కేటీఆర్ ప్రశ్నించారు. కేసీఆర్ మూడోసారి అధికారంలోకి రాగానే పింఛన్లు పెంచుతామని మాటిచ్చారు. అన్నపూర్ణ పథకం కింద రేషన్‌ కార్డు ఉన్న వారికి సన్నబియ్యం ఇస్తామని పునరుద్ఘాటించారు.
Minister KTR Road Show at Kama Reddy : బీఆర్‌ఎస్‌ ప్రభుత్వం ఇస్తున్న 24 గంటల కరెంటు అనేది పీసీసీ అధ్యక్షుడు రేవంత్‌రెడ్డి(Revanth Reddy)కి కనిపించడం లేదా అంటూ కేటీఆర్ మండిపడ్డారు. కాంగ్రెస్ వాళ్లు అనుమాన పక్షులు వారికి అనుమానం ఎక్కువని విమర్శించారు. కాంగ్రెస్ హయాంలో కరెంటు తీగల మీద బట్టలు అరబెట్టుకోవాల్సిన పరిస్థితి ఉండేదని.. ఇవాళ కరెంటు వస్తుందో లేదో తెలుసుకోవాలంటే రేవంత్‌రెడ్డి, షబ్బీర్‌ అలీ వచ్చి కరెంటు తీగలను పట్టుకుంటే సరిపోతుందని ఎద్దేవా చేశారు.
"అసైన్డ్‌ భూములు ఉన్నవాళ్లు అందరికీ శుభవార్త కేసీఆర్ మూడోసారి గెలవగానే ఆ భూములు మీద మొత్తం హక్కులు ఇస్తాం. వాటిని కావాల్సిస్తే అమ్ముకోవచ్చు.. పిల్లలకు ఇచ్చుకోవచ్చు. రుణమాఫీ చేయడానికి ఆనాడు కరోనా సమయంలో లక్ష కోట్ల రూపాయల నష్టపోయాము. రైతుమాఫీని చేసే బాధ్యత మాది." - కేటీఆర్, బీఆర్‌ఎస్‌ కార్యనిర్వాహక అధ్యక్షుడు
Telangana Election Polls 2023 : ఈ దఫా మళ్లీ అధికారంలోకి వచ్చాక రూ.400లకే వంట గ్యాస్‌ ఇస్తామని కేటీఆర్ హామీ ఇచ్చారు. గుంట భూమి ఉన్న రైతుకు కూడా రూ.5 లక్షల రైతుబీమా(Rythu bheema) ఇస్తామన్నారు. రేషన్‌కార్డు ఉన్న ప్రతి కుటుంబానికి జీవిత బీమా ఇస్తున్నామని.. అలాగే అసైన్డ్‌ భూములు ఉన్న వారికి భూ హక్కులు కల్పిస్తామని మాట ఇచ్చారు. రాష్ట్ర ప్రభుత్వం తీసుకొవచ్చిన ధరణి తీసేసి పట్వారీ వ్యవస్థ తెస్తామని కాంగ్రెస్ అంటుందని.. ఒకవేళ పట్వారీ వ్యవస్థ ఎస్తే ఎలా ఉంటుందో మీ అందరికీ బాగా తెలుసని వివరణ ఇచ్చారు. కేసీఆర్ వస్తే కామారెడ్డిలోని ప్రతి మండలం, ప్రతి గ్రామానికి నిధులు వరద పారుతుందని స్పష్టం చేశారు.
