జనగామ జిల్లా చిల్పూర్ మండలం పల్లగుట్టలో అంబేడ్కర్ విగ్రహ ఆవిష్కరణకు హాజరైన ఎమ్మెల్యే తాటికొండ రాజయ్య చిన్నారులతో కలిసి బుల్లెట్ బండి (bullet bandi) పాటకు డ్యాన్స్ చేశారు. కార్యక్రమ అనంతరం స్టేడిపైనే పిల్లలతో కలిసి కాలు కదిపారు. ఈ వీడియో సామాజిక మాధ్యమాల్లో వైరల్ అవుతోంది.
ఈ మధ్యకాలంలో బుల్లెట్ బండి పాట (bullet bandi song) ఎంతలా పాపులర్ అయ్యిందో అందరికీ తెలిసిందే.. ఓ పెళ్లి వేడుకలో కాబోయేవాడిని మెప్పించడానికి వధువు వేసిన డ్యాన్స్ సామాజిక మాధ్యమాలను ఓ ఊపు ఊపింది. ఇప్పుడు ఏ ఫంక్షన్లో చూసిన బుల్లెట్ బండి పాట లేదంటే అది ఫంక్షన్ కాదేమో అన్నంతగా అయిపోయింది. ఒక్క మాటలో చెప్పాలంటే బుల్లెట్ బండి పాట లేనిదే వేడుక లేదు. మాట తిరిగిన చిన్నారి మొదలు పండు ముసలి వరకు నాలుకపై బుల్లెట్ పరుగులు పెడుతూనే ఉంది.
MP Kavitha: బుల్లెట్ బండి పాటకు అదిరిపోయే స్టెప్పులేసిన ఎంపీ కవిత
అందరి నోటా... అదే పాట
పెళ్లి వేడుకలు, ఆస్పత్రులు, ఇతర ఫంక్షన్లలో బుల్లెట్ బండిపాటకున్న క్రేజ్ అంతా ఇంతా కాదు. ఇటీవల ఏదైనా వీడియో వైరల్ అయ్యిందంటే... వెంటనే అందరికీ వచ్చే అనుమానం బుల్లెట్ బండిపాటే అని.. మరి అంత క్రేజ్ వచ్చింది ఈ పాటకు. తాజాగా ఈ పాటకు తన డ్యాన్ను జతచేశారు ఎమ్మెల్యే తాటికొండ రాజయ్య.
జనగామ జిల్లా స్టేషన్ ఘన్పూర్లోని ఓ కార్యక్రమానికి హాజరైన ఎమ్మెల్యే రాజయ్య.. స్థానికంగా ఉన్న చిన్నారులతో కలిసి స్టేజిపైనే బుల్లెట్ బండి పాటకు స్టెప్పులేశారు. సాక్ష్యాత్తు ఎమ్మెల్యే తమతో డ్యాన్స్ చేస్తుండడంతో ఆనందంతో పిల్లలు కేరింతలు కొడతూ డ్యాన్స్ చేశారు. నియోజకవర్గంలోని చిల్పూర్ మండలం పల్లగుట్టలో అంబేడ్కర్ విగ్రహ ఆవిష్కర కార్యక్రమం జరిగింది. ఈ కార్యక్రమానికి ముఖ్య అతిథిగా హాజరైన ఎమ్మెల్యే రాజయ్య... కార్యక్రమ అనంతరం పిల్లలతో కలిసి స్టేజిపైనే స్టెప్పులు వేశారు. బుల్లెట్ బండి పాటకు తనదైన స్టెప్పులతో ఆకట్టుకున్నారు. తమతో కలిసి ఎమ్మెల్యే డ్యాన్స్ చేస్తుండడంతో చిన్నారుల ఆనందానికి అవధుల్లేవు.
ఇదీ చూడండి: పక్షవాతం రోగితో నర్సు 'బుల్లెట్ బండి' డాన్స్
