Battery Bike: పది రూపాయలకే 50 కిలోమీటర్లు తిరిగే బ్యాటరీ బైక్​

author img

By

Published : Jul 15, 2021, 2:29 PM IST

electronic Mechanic Invented a Battery Bike in jangaon

లీటర్ పెట్రోల్ ధర వంద రూపాయలు దాటడంతో వాహనదారులు కొత్త ఆవిష్కరణలతో ప్రత్యామ్నాయ మార్గాలు వెతుక్కుంటున్నారు. పెట్రోల్ ఖర్చులు ఆదా చేసుకునేందుకు తన ద్విచక్ర వాహనానికి బ్యాటరీల సాయంతో నడిచే మోటార్​ను బిగించి పలువురికి ఆదర్శంగా నిలుస్తున్నాడు జనగామకు చెందిన కూరపాటి విద్యాసాగర్.

పది రూపాయలకే 50 కిలోమీటర్లు తిరిగే బ్యాటరీ బైక్​

పెట్రోల్​ ధరలకు సామాన్యులు బెంబెలెత్తిపోతున్నారు. ఎటైనా వెళ్లాలంటే బండెక్కే జనం.. ఇప్పుడు ఆ మాట వింటేనే భయపడుతున్నారు. పెట్రో మంట నుంచి తప్పించుకునేందుకు ప్రత్యామ్యాయాలు వెతుక్కుంటున్నారు. ప్రైవేటు ట్రావెల్స్​ కూడా ఛార్జీలు పెంచటం వల్ల బస్సులే దిక్కయ్యాయి. బస్సులు సమయానికి అనుకూలంగా ఉండకపోవటం వల్ల ప్రజలు తీవ్ర ఇబ్బందులు పడుతున్నారు. వీటన్నింటికీ చెక్​ పెడుతూ.. ఓ వ్యక్తి తన పెట్రోల్​ ద్విచక్రవాహనాన్ని... బ్యాటరీ వాహనంగా తయారు చేసుకున్నాడు.

పెట్రోల్​ బైక్​ కాస్తా.. ఎలక్ట్రిక్​ బైక్​గా..

జనగామకు చెందిన విద్యాసాగర్ ఎలక్ట్రానిక్ దుకాణం నిర్వహిస్తున్నాడు. తన పని నిమిత్తం ఉళ్లో ద్విచక్రవాహనంపై తిరిగేందుకు రోజుకు రూ. 100 ఖర్చవుతోంది. పెట్రోల్​ ధరలు రోజురోజుకు పెరగటం వల్ల.. మరింత భారం పడుతోంది. ఎలాగైనా ఈ ఖర్చు నుంచి తప్పించుకోవాలని తలచాడు. తన మెకానిక్​ మేధస్సుతో ఆలోచించాడు. తన వాహనాన్ని ఎలక్ట్రిక్​గా మార్చితే.. సమస్య పరిష్కారమవుతుందని తెలుసుకున్నాడు. ఇందు కోసం పది వేల రూపాయలతో 4 బ్యాటరీలు, మరో 7500 రూపాయలు వెచ్చించి ఆన్​లైన్​లో మోటార్​ను కొనుగోలు చేశాడు. ఓ బైక్​ మెకానిక్ సహకారంతో తన ద్విచక్రవాహనానికి బ్యాటరీలు, మోటార్​ అమర్చుకున్నాడు. తన వాహనానికి ఉన్న పెట్రోల్ ఇంజిన్​ను తొలగించాడు. తన ఐడియా విజయవంతమైంది. 5 గంటల పాటు విద్యుత్ ఛార్జింగ్ పెడితే... 50 కిలోమీటర్ల వరకు ప్రయాణం చేస్తున్నాడు. కేవలం పది రూపాయల ఖర్చుతో రోజు మొత్తం బైక్​పై తిరుగుతున్నాడు.

నెలకు రూ. 3000 ఆదా...

"నా బైక్​ను ఎలక్ట్రిక్​ వాహనంగా మార్చుకోవటం చాలా సంతోషంగా ఉంది. పెరుగుతున్న పెట్రోల్​ ధరలు నన్ను ఈ ఆవిష్కరణ చేసేలా ప్రేరేపించాయి. నా వృత్తిపరంగా నేను రోజూ బైక్​పై స్థానికంగా తిరగాల్సి ఉంటుంది. అందుకోసం నాకు రోజుకు రూ.100 పెట్రోల్​ ఖర్చవుతుంది. ఇప్పుడు మాత్రం కేవలం పది రూపాయలతో రోజు గడిచిపోతోంది. బ్యాటరీలు ఛార్జింగ్ కావడానికి ఒకటి నుంచి ఒకటిన్నర యూనిట్ కరెంటు మాత్రమే ఖర్చవుతుంది. ఇలా చేయటం వల్ల నాకు నెలకు దాదాపు రూ. 3000 ఆదా అవుతున్నాయి."

- విద్యాసాగర్​, ఎలక్ట్రానిక్​ బైక్​ ఆవిష్కర్త

ఇదీ చూడండి: మరోసారి పెరిగిన పెట్రోల్​, డీజిల్​ ధరలు

ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.