తెరాసలో ఆత్మగౌరవంతో వ్యవహరిస్తే ఈటల రాజేందర్ లాగా వారిని కూడా బయటికి పంపిస్తారని.. ఆ పార్టీలో ఉండాలంటే కేసీఆర్ కుటుంబానికి, కల్వకుంట్ల కుటుంబానికి బానిసలుగా మాత్రమే ఉండాలని కేంద్రమంత్రి కిషన్ రెడ్డి ఎద్దేవా చేశారు. జన ఆశీర్వాద యాత్రలో భాగంగా జనగామకు చేరుకున్న కేంద్రమంత్రికి భాజపా నాయకులు, కార్యకర్తలు ఘనస్వాగతం పలికారు. కాంగ్రెస్ ప్రభుత్వ హయాంలో 12లక్షల కోట్ల అవినీతి జరిగిందని కిషన్ రెడ్డి ఆరోపించారు. బలగాలపై దాడిచేసిన ఉగ్రవాదులను వారి ప్రాంతాలకే వెళ్లి వారిని హతమార్చి పగతీర్చుకున్నామని గుర్తు చేశారు. ఏడేళ్లలో ఒక్కరోజు కూడా సెలవు తీసుకోకుండా ప్రధానమంత్రి పనిచేస్తున్నారని కేంద్రమంత్రి కిషన్రెడ్డి కొనియాడారు. హుజూరాబాద్లో తెరాస పార్టీ రాజకీయ నాయకులను కొనుగోలు చేస్తోందని ఆయన ఆరోపించారు. ప్రజాస్వామ్య దేశంలో ప్రజలే దేవుళ్లని, ప్రజలే న్యాయనిర్ణేతలని ఆయన అన్నారు. ఎవరు ఎమ్మెల్యేగా, ఎంపీగా, సర్పంచ్గా, వార్డ్ మెంబర్గా ఉండాలో ప్రజలే నిర్ణయిస్తారన్నారు. తెలంగాణ ఉద్యమంలో 12వందల మంది బలిదానాలు చేసుకున్నారని కిషన్ రెడ్డి గుర్తు చేశారు. పోరాడి సాధించుకున్న రాష్ట్రంలో నియామకాలు జరగడం లేదని విమర్శించారు.
తెలంగాణలో కేసీఆర్ కుటుంబ పాలన నడుస్తోందన్నారు. గులాబీ పార్టీ రాష్ట్రంలో ప్రతిపక్షాలు ఉండొద్దని కోరుకుంటోందని ఆరోపించారు. ఏడేళ్ల పాలనలో డబుల్బెడ్రూం ఇళ్లపేరుతో కాలయాపన చేస్తున్నారని... ఇప్పటివరకు లక్ష ఇళ్లను కూడా నిర్మించలేదన్నారు. కేసీఆర్ పాలనలో ఇల్లు అనేది అందని ద్రాక్షలా తయారయ్యిందన్నారు. తెలంగాణ ప్రజలు కూడా మార్పు కోరుకుంటున్నారని కేంద్రమంత్రి కిషన్రెడ్డి అన్నారు.
ఇదీ చదవండి: Kishan Reddy: 'వచ్చేది భాజపా ప్రభుత్వమే.. మొదటి అడుగు హుజూరాబాద్లోనే'
