వినాయక నిమజ్జనోత్సవంలో జగిత్యాల మున్సిపల్ ఛైర్పర్సన్ బోగ శ్రావణికి త్రుటిలో పెను ప్రమాదం తప్పింది. జగిత్యాల చింతకుంట చెరువులో వినాయక నిమజ్జనంలో మున్సిపల్ ఛైర్‌పర్సన్‌తో పాటు పాలువురు కౌన్సిలర్లు పాల్గొన్నారు. నిమజ్జనాలను ప్రారంభించేందుకు వినాయకుని విగ్రహాన్ని ఓ తెప్పపై చెరువులోని తీసుకెళ్లారు. విగ్రహంతో పాటు మున్సిపల్ ఛైర్పర్సన్ శ్రావణి, కౌన్సిలర్లు కూడా వెళ్లారు. చెరువు మధ్యలోకి వెళ్లాక.. విగ్రహాన్ని నీటిలో వదిలేందుకు ప్రయత్నించారు. ఈ క్రమంలోనే తెప్ప ఒక్కసారిగా ఒక వైపు వంగిపోయింది.
తెప్ప మీద ఉన్న వాళ్లలో కొంత మంది చెరువులో పడిపోయారు. ఛైర్పర్సన్ శ్రావణితో పాటు మహిళ కౌన్సిలర్ కూడా నీటిలో పడిపోయారు. వెంటనే అప్రమత్తమైన మిగతావారు.. ఛైర్పర్సన్ను ఒక్కసారిగా పైకి లాగారు. మరో మహిళా కౌన్సిలర్ను కూడా కాపాడి ఇద్దరిని ఒడ్డుకు చేర్చారు. నిమజ్జనంలో పాల్గొన్ని మిగతావాళ్లు కూడా సురక్షితంగా ఒడ్డుకు చేరుకున్నారు. ఈ ఘటనలో ఎవరికీ ఏమీ కాకపోవటంతో అంతా ఊపిరి పీల్చుకున్నారు. విఘ్నేశుని విగ్రహం మాత్రం పడిపోకుండా.. తెప్పపై అలాగే ఉండటం గమనార్హం.
నిమజ్జనాల సమయంలో అందరూ అప్రమత్తంగా ఉండాలని.. మున్సిపల్ ఛైర్పర్సన్ శ్రావణి సూచించారు. తనకు ఎదురైన ఘటనను దృష్టిలో ఉంచుకుని.. జాగ్రత్తగా వ్యవహించాలని కోరారు. తెప్పల మీద ఎక్కువ మంది వెళ్లకుండా.. అన్ని జాగ్రత్తలతోనే చెరువులోకి వెళ్లాలని తెలిపారు.
ఇదీ చూడండి:
