రాష్ట్రంలో మొబిలిటీ వ్యాలీ.. జీనోమ్‌ వ్యాలీ తరహాలో ఏర్పాటుకు సర్కారు సన్నాహాలు

International Mobility Valley: జీనోమ్‌ వ్యాలీ తరహాలో వాహన రంగంలో భారీగా పెట్టుబడుల సాధన, పరిశ్రమల ఏర్పాటు, ఉపాధి కల్పన సహా బహుముఖ ప్రగతి లక్ష్యంతో తెలంగాణలో అంతర్జాతీయ మొబిలిటీ వ్యాలీ ఏర్పాటు చేయాలని రాష్ట్ర ప్రభుత్వం నిర్ణయించింది. వాహనాల తయారీ, సాంకేతికత, పరిశోధనలు, ఆవిష్కరణలకు కేంద్రంగా.. అత్యుత్తమ ఆటోమోటివ్‌ ఎకో సిస్టం(పర్యావరణ వ్యవస్థ)ను తీర్చిదిద్దేందుకు సన్నాహాలు చేస్తోంది. వ్యాలీ ఏర్పాటుకు వికారాబాద్‌తో పాటు మరికొన్ని ప్రాంతాలను పరిశీలిస్తోంది.

ఇతర రంగాలతో పోలిస్తే వాహన రంగంలో తెలంగాణ కొంత వెనుకబాటులో ఉంది. ఆ రంగంలోనూ అభివృద్ధి సాధించేందుకు ప్రభుత్వం సన్నాహాలు చేపట్టింది. రవాణా వాహనాల తయారీ సంస్థలతో సంప్రదింపులు జరుపుతోంది. దేశంలో తొలిసారిగా విద్యుత్‌ వాహనాల విధానాన్ని ప్రవేశపెట్టింది. వాహన రంగంలో పరిశోధన, అభివృద్ధి, సాంకేతిక కేంద్రాలను పెద్దఎత్తున ఏర్పాటు చేయిస్తోంది. ఈ రంగం ప్రాచుర్యం కోసం దేశంలో తొలిసారిగా ఫార్ములా-ఇ రేసుకు ఆతిథ్యం ఇస్తోంది.

వాహనాలపై శిఖరాగ్ర సదస్సు నిర్వహిస్తోంది. ఈ పరిణామాల క్రమంలో మొబిలిటీ వ్యాలీ ఏర్పాటుపై దృష్టి సారించింది. రాష్ట్రంలో 1999లో ఏర్పాటైన జీనోమ్‌ వ్యాలీ ఆసియాలోనే అతిపెద్ద జీవశాస్త్రాల సమూహంగా ఎదిగింది. దీన్ని స్ఫూర్తిగా తీసుకొని మొబిలిటీ వ్యాలీకి ప్రభుత్వం రూపకల్పన చేస్తోంది.

రెండు వేల ఎకరాల్లో: మొబిలిటీ వ్యాలీని రెండు వేల ఎకరాల్లో ఏర్పాటు చేసేందుకు ప్రభుత్వం ప్రణాళికను సిద్ధం చేసింది. అందులో రవాణా సంస్థల అవసరాల ప్రాతిపదికన అత్యుత్తమ మౌలిక సదుపాయాలను కల్పించనుంది. సంప్రదాయ ఆటోమోటివ్‌ ఒరిజినల్‌ ఎక్విప్‌మెంట్‌ తయారీదారుల(ఓఈఎం)తో పాటు సరఫరాదారులు, సాంకేతిక సంస్థలు, అంకురాలకు ఇందులో భాగస్వామ్యం కల్పించనున్నారు.

పెట్రోలు, డీజిల్‌తోపాటు విద్యుత్‌ కార్లు, వాటి విడిభాగాల తయారీ యూనిట్లకు స్థలాలు కేటాయిస్తారు. అంకురాల కోసం ప్రత్యేక ఇంక్యుబేటర్‌ను ప్రారంభిస్తారు. రవాణా సంస్థలకు చిప్‌లు, ఇతర సాంకేతిక పరికరాల తయారీ సంస్థలకు, సాంకేతిక, సాఫ్ట్‌వేర్‌, డిజిటల్‌ కేంద్రాలకు అవకాశమిస్తారు. ఇప్పటికే హ్యుందాయ్‌ భాగస్వామిగా చేరేందుకు ముందుకొచ్చింది. తెలంగాణలో జెడ్‌ఎఫ్‌, బోష్‌ కొత్త సాంకేతిక కేంద్రాలను ప్రారంభించాయి. త్వరలోనే మరికొన్ని సంస్థలు భాగస్వాములుగా చేరే వీలుంది. సుజుకి సంస్థతోనూ మంత్రి కేటీఆర్‌ చర్చలు జరిపారు.

సిలికాన్‌ వ్యాలీలా అభివృద్ధి: తెలంగాణను రవాణా వాహనాల తయారీ హబ్‌గా, పెట్టుబడులకు గమ్యస్థానంగా, స్థానికులకు భారీఎత్తున ఉపాధి కల్పించేలా మార్చే బృహత్తర సంకల్పంతో మంత్రి కేటీఆర్‌ మొబిలిటీ వ్యాలీకి రూపకల్పన చేశారు. సిలికాన్‌ వ్యాలీ మాదిరిగానే దీన్ని తీర్చిదిద్దుతాం. ఇప్పటికే జీనోమ్‌ వ్యాలీ ద్వారా అంతర్జాతీయ స్థాయిలో తెలంగాణ ఖ్యాతి పొందింది. మొబిలిటీ వ్యాలీ సైతం అదే స్థాయిలో విజయవంతమవుతుంది. -జయేశ్‌రంజన్‌, పరిశ్రమలు, ఐటీ శాఖల ముఖ్యకార్యదర్శి

ఇవీ చదవండి: ఏ పార్టీ నుంచి పోటీ చేసేది ఎన్నికలపుడు చెబుతా: కోమటిరెడ్డి

బంగాళదుంపలు దొంగిలించిన పోలీసులు