Goa CM Telangana Tour: భాజపా రాష్ట్ర అధ్యక్షుడు బండి సంజయ్‌ ‘ప్రజా సంగ్రామ యాత్ర’ విజయవంతంగా సాగుతోందని గోవా సీఎం ప్రమోద్ సావంత్ అన్నారు. పాదయాత్రకు వస్తున్న ఆదరణ చూస్తే తెలంగాణలో భాజపా ప్రభుత్వం ఏర్పడుతుందనే నమ్మకం కలుగుతోందని చెప్పారు. రాష్ట్ర పర్యటనలో ఉన్న ప్రమోద్ సావంత్.. హైదరాబాద్ నాంపల్లిలోని భాజపా రాష్ట్ర కార్యాలయంలో మీడియాతో మాట్లాడారు.
గోవా వచ్చి చూడండి..: "చివరి వ్యక్తి వరకూ సంక్షేమ పథకాలు అందడమే ప్రధాని మోదీ లక్ష్యం. డబుల్ ఇంజిన్ సర్కారు అన్ని రాష్ట్రాల్లో రావాలనేదే మా ఆకాంక్ష. ఆత్మనిర్భర్‌ భారత్‌ అమలుకు కృషి చేస్తున్నాం. గోవాలో వంద శాతం వ్యాక్సినేషన్ పూర్తి చేశాం. పర్యాటకులకు కూడా పూర్తి వ్యాక్సిన్ వేయించిన రాష్ట్రం గోవా. మా రాష్ట్రంలో అన్ని సంక్షేమ పథకాలు అమలు చేస్తున్నాం. డబుల్ ఇంజిన్ సర్కార్‌ అంటే ఏంటో గోవా వచ్చి చూడండి. గోవా తరహా అభివృద్ధి కావాలంటే తెలంగాణలో కూడా డబుల్ ఇంజిన్ సర్కారు రావాలి. తెలంగాణలో ప్రభుత్వం ఏర్పాటు చేసి తీరుతాం." -ప్రమోద్ సావంత్, గోవా ముఖ్యమంత్రి
వడ్డీలేని రుణాలు మేము కూడా ఇస్తున్నాం..: గోవాలో వితంతు పింఛన్లు, కల్యాణ లక్ష్మి, రైతులకు వడ్డీలేని రుణాలు తాము కూడా ఇస్తున్నామని ప్రమోద్ సావంత్ అన్నారు. తెలంగాణ కంటే ఎక్కువ పథకాలను అందిస్తున్నామని.. పంచాయతీ స్థాయిలో గెజిటెడ్ అధికారులు ప్రతివారం పర్యటిస్తున్నారని చెప్పారు. సంక్షేమ పథకాలు కింది స్థాయి వరకు చేరేలా కృషి చేస్తున్నామని వెల్లడించారు. కేంద్ర హోంమంత్రి అమిత్‌షా ఈ నెల 14న తెలంగాణకు రాబోతున్నారన్న ఆయన.. కేంద్ర మంత్రి కిషన్‌ రెడ్డి గోవా ఎన్నికల్లో బాగా పని చేశారని కొనియాడారు. ఆయూష్ అభివృద్ధి కోసం జైపూర్‌లో రీసెర్చ్ సెంటర్ ఏర్పాటును అభినందించారు.
ఇవీ చదవండి: బండిసంజయ్కు కేటీఆర్ స్వీట్ వార్నింగ్.. దానికి తోడు మహిళ వీడియో..!
