Ravi shastri about Dhoni : మంగళవారం జరిగిన తొలి టీ20 మ్యాచ్‌లో మొదట బ్యాటింగ్‌ చేసిన భారత్‌ 208 పరుగుల భారీ లక్ష్యాన్నే నిర్దేశించింది. అయితే, ఆ తర్వాత లక్ష్య ఛేదనకు దిగిన ఆసీస్‌ ఆటగాళ్లకు పలుమార్లు జీవనదానాలు లభించాయి. ఓపెనర్‌గా దిగిన కామెరూన్‌ గ్రీన్‌ నిజానికి 5వ ఓవర్లోనే ఔట్‌ అయ్యేవాడు. ఆ ఓవర్లో చాహల్ వేసిన మూడో బంతి గ్రీన్‌ ప్యాడ్‌కు తాకింది. అయితే, భారత్‌వైపు ఎవరూ అప్పీల్‌ చేయలేదు. ఆ తర్వాత ఆరో ఓవర్‌ సమయంలో రిప్లై చూపించగా.. గ్రీన్‌ ఎల్‌బీడబ్ల్యూగా తేలింది. దీంతో చాహల్‌, రోహిత్‌, దినేశ్‌ కార్తిక్‌ ఒకరి ముఖాలు ఒకరు చూసుకొన్నారు. అందివచ్చిన అవకాశాన్ని టీమిండియా గుర్తించలేకపోయింది. ఆ తర్వాత చెలరేగిన గ్రీన్‌ 30 బంతుల్లో 61 పరుగులు చేసి లక్ష్య ఛేదనలో ఆసీస్‌కు బలమైన పునాది వేశాడు.

ఎల్‌బీడబ్ల్యూ అవకాశాన్ని టీమిండియా గుర్తించకపోవడంపై మ్యాచ్‌ కామెంటేటర్లుగా ఉన్న సునీల్‌ గావస్కర్‌, రవిశాస్త్రి అసంతృప్తి వ్యక్తం చేశారు. ఆ సందర్భంగా రవిశాస్త్రి మాట్లాడుతూ.. "వికెట్‌ కీపర్లు పోషించాల్సిన అత్యంత ముఖ్యమైన పాత్ర ఇదే. ఈ విషయంలో ఎంఎస్‌ ధోనీ ఎంతో ఉత్తమంగా వ్యవహరించేవాడు" అని చెప్పుకొచ్చారు. మూడు టీ20ల సిరీస్‌లో భారత్‌ 0-1తో వెనుకంజలో ఉంది. ఆసీస్‌తో రెండో టీ20 శుక్రవారం (సెప్టెంబరు 23) నాగ్‌పుర్‌ వేదికగా జరగనుంది. ఈ మ్యాచ్‌లోనైనా టీమిండియా గెలిచి సిరీస్‌ అవకాశాలను నిలబెట్టుకోవాలని అభిమానులు ఆశిస్తున్నారు.

ఇదీ చదవండి: టీమ్ ఇండియాలో ​కీలక మార్పులు.. ఆ ముగ్గురు ఇన్​.. వీళ్లు ఔట్​!

నేడే ​ఇండియా-ఆస్ట్రేలియా రెండో టీ20 టికెట్‌ విక్రయాలు