Chiranjeevi Meets AP CM Jagan : ఏపీ సీఎం జగన్తో సినీ హీరో మెగాస్టార్ చిరంజీవి భేటీ అయ్యారు. హైదరాబాద్ బేగంపేట విమానాశ్రయం నుంచి ప్రత్యేక విమానంలో గన్నవరం ఎయిర్పోర్ట్కు వెళ్లిన చిరంజీవి.. తాడేపల్లిలోని ఏపీ సీఎం క్యాంపు కార్యాలయానికి చేరుకున్నారు. జగన్తో భేటీలో మెగాస్టార్ సినిమా టికెట్ల ధరలపై చర్చించారు. సుమారు గంటన్నర పాటు ఈ సమావేశం జరిగింది.
Chiranjeevi Jagan Meeting: అంతకు ముందు ప్రత్యేక విమానంలో గన్నవరం ఎయిర్ పోర్ట్ వచ్చిన చిరంజీవి.. ఏపీ సీఎం జగన్‌మోహన్‌రెడ్డి ఆహ్వానం మేరకు విజయవాడ వచ్చినట్లు తెలిపారు. ‘‘సినీ పరిశ్రమ బిడ్డగా ఏపీ సీఎంతో మాట్లాడేందుకు వచ్చా. సినీ పరిశ్రమకు సంబంధించిన అంశాలను సీఎంతో చర్చిస్తాను. జగన్తో భేటీ తర్వాత అన్ని విషయాలు చెబుతా. గంటన్నరలో సీఎంతో చర్చించిన విషయాలను మీకు వివరిస్తాను’’ అని చిరంజీవి అన్నారు. అనంతరం గన్నవరం ఎయిర్‌పోర్టు నుంచి తాడేపల్లిలోని ఏపీ సీఎం క్యాంపు కార్యాలయానికి చిరంజీవి చేరుకున్నారు.
చిరు-జగన్ మధ్య గంటన్నర పాటు జరిగిన చర్చలో సినీ పరిశ్రమ ప్రస్తుతం ఎదుర్కొంటున్న సంక్షోభం, టికెట్ ధరలపై ప్రధానంగా చర్చించారు. చిత్ర పరిశ్రమపై పలువురు వైకాపా నాయకులు చేస్తున్న అనుచిత వ్యాఖ్యలను ఈ సందర్భంగా సీఎం జగన్‌కు దృష్టి చిరంజీవి తీసుకెళ్లనట్లు సమాచారం.
నాగ్ ఏమన్నారంటే..?
చిరంజీవి తన ఒక్కరికోసమే ఏపీ సీఎం జగన్తో మాట్లాడటానికి వెళ్లటం లేదని అక్కినేని నాగార్జున అన్నారు. తెలుగు సినీ పరిశ్రమ కోసమే ఈ భేటీ అని స్పష్టం చేశారు. బంగార్రాజు సినిమా విడుదల ఉండటం వల్ల తాను వెళ్లలేకపోయానని చెప్పారు. జగన్తో భేటీ ఉంటుందని వారం క్రితమే చిరంజీవి చెప్పారన్న నాగ్.. జగన్తో చిరంజీవికి సన్నిహిత సంబంధాలు ఉన్నాయని తెలిపారు.
