Beijing Olympics boycott: చైనాలో తీవ్ర మానవ హక్కుల ఉల్లంఘన చోటుచేసుకుంటోందని పేర్కొంటూ వచ్చే ఏడాది ఫిబ్రవరిలో బీజింగ్‌లో జరిగే శీతకాల ఒలింపిక్ క్రీడలను దౌత్యపరంగా బహిష్కరిస్తున్నట్లు అమెరికా ప్రకటించింది. తమ అధికారులు, దౌత్యవేత్తలు ఎవరూ అందులో పాల్గొనబోరని బైడెన్‌ సర్కారు స్పష్టీకరించింది. తమ క్రీడాకారులు మాత్రం అందులో భాగస్వామ్యం వహిస్తారని వెల్లడించింది. ఆకుస్‌ కూటమిలో భాగస్వాములుగా ఉన్న ఆస్ట్రేలియా, యునైటెడ్‌ కింగ్‌డమ్‌లతో పాటు కెనడా సైతం అమెరికా బాటలో నడుస్తున్నట్లు పేర్కొన్నాయి. దేశాల విధానాల పట్ల నిరసన తెలిపేందుకు ఎన్నో మార్గాలున్నాయి. అంతర్జాతీయంగా సుహృద్భావాన్ని, దౌత్య సంబంధాలను పెంపొందించే క్రీడలను రాజకీయ ప్రయోజనాలకోసం వాడుకోవడంపై ప్రస్తుతం నిరసనలు వ్యక్తమవుతున్నాయి. అంతర్జాతీయ ఒలింపిక్ సంఘం(ఐఓసీ)లో అన్ని దేశాల భాగస్వామ్యం ఉంది. ఆది నుంచీ ఐఓసీ రాజకీయంగా తటస్థంగా ఉంటూ వస్తోంది. అది నిర్వహించే ఆటల్లోకి రాజకీయాలను చొప్పిస్తే క్రీడాస్ఫూర్తి దెబ్బతినే అవకాశం ఉందని ఐఓసీ అధ్యక్షుడు థామస్‌ బాక్‌ ఆవేదన వ్యక్తం చేస్తున్నారు.
Diplomatic boycott Beijing Olympics
క్రీడల ద్వారా ప్రశాంతమైన, ఉత్తమ ప్రపంచాన్ని రూపుదిద్దాలని ఐక్యరాజ్య సమితి సాధారణ సభ ఇటీవల తీర్మానించింది. అగ్రరాజ్య బహిష్కరణ ప్రకటనకు కొద్ది రోజుల ముందే ఆ నిర్ణయం వెలువడింది. ఒక్క అమెరికా తప్ప 173 సభ్య దేశాలు దానికి అంగీకారం తెలిపాయి. ఒలింపిక్ క్రీడలు రాజకీయాలకు దూరంగా ఉంటేనే ఐరాస ఆకాంక్ష నెరవేరుతుందని ఆ సంస్థలో ఐఓసీ శాశ్వత పరిశీలకులు లూయీ మొరీనో చెబుతున్నారు. రాజకీయ ఉద్దేశాలతో ఒలింపిక్స్‌ను బహిష్కరించడాన్ని ఐఓసీ తీవ్రంగా ఖండించింది. ప్రపంచ అథ్లెటిక్స్‌ అధ్యక్షుడు సెబాస్టియన్‌ కో సైతం తన నిరసన గళం వినిపించారు. అఫ్గానిస్థాన్‌పై సోవియట్లు దండెత్తిన సమయంలో 1980 మాస్కో ఒలింపిక్స్‌ను వాషింగ్టన్‌ బహిష్కరించింది. బ్రిటన్‌ సహా చాలా దేశాలు అమెరికాకు వత్తాసు పలికాయి. బ్రిటిష్‌ ఒలింపిక్ సంఘం అప్పటి ప్రభుత్వ నిర్ణయాన్ని తోసిరాజని ఆ క్రీడల్లో పాల్గొనాలని నిర్ణయించింది. వాటిలోనే సెబాస్టియన్‌ కో విజేతగా అవతరించారు.
బీజింగ్ ఒలింపిక్స్లో తమ అథ్లెట్లు పాల్గొనడానికి సమ్మతించడం ద్వారా ఒలింపిక్స్ విలువలను బైడెన్‌ సర్కారు గుర్తించినట్లు అర్థమవుతోంది. అదే సమయంలో దౌత్యపరమైన నిషేధం ద్వారా క్రీడల విషయంలో రాజకీయ తటస్థతను అగ్రరాజ్యం విస్మరించినట్లు విమర్శలు వినిపిస్తున్నాయి. ఇటువంటి బహిష్కరణల వల్ల అథ్లెట్లలో మానసిక ఒత్తిడి అధికమయ్యే అవకాశం ఉంది. ఆ క్రీడల్లో పాల్గొనడం ద్వారా మానవ హక్కుల ఉల్లంఘనను తాము సమ్మతిస్తున్నామేమో అనే భావన వారిలో నెలకొనవచ్చు. నిజానికి గతంలో చాలా ఒలింపిక్స్ బహిష్కరణలు విఫలమయ్యాయి. హిట్లర్‌ హయాములో జర్మనీలో యూదులపై దాష్టీకాలకు నిరసనగా 1936 బెర్లిన్‌ ఒలింపిక్స్‌ను బహిష్కరించాలని అమెరికా ఉన్నత స్థాయి దౌత్యవేత్తలు సూచించినా ఫలితం లేకపోయింది. వాటిలో పాల్గొనాలని అమెరికన్‌ ఒలింపిక్ కమిటీ నిర్ణయించింది. ప్రస్తుతం అమెరికా నిర్ణయాన్ని డ్రాగన్‌ ఒక రాజకీయ ఎత్తుగడగా అభివర్ణించింది. నిక్సన్‌ అమెరికా అధ్యక్షుడిగా ఉన్న సమయంలో 1971లో చైనా, అగ్రరాజ్యం మధ్య దౌత్యపరమైన సంబంధాలను పునరుద్ధరించడానికి తొమ్మిది మంది టేబుల్‌ టెన్నిస్‌ క్రీడాకారులను చైనాకు పంపించారు. అది పింగ్‌ పాంగ్‌ దౌత్యంగా పేరుగాంచింది. అంతర్జాతీయ సంబంధాలకు క్రీడలు ఎలా తోడ్పడతాయన్నదానికి అదే నిదర్శనం. ప్రస్తుతం పలు దేశాల ధోరణి క్రీడాస్ఫూర్తికి విరుద్ధంగా ఉండటం ఆందోళనకరం.
- వాసిల్‌ గిర్గినొవ్‌
(బ్రునెల్‌ యూనివర్సిటీ లండన్‌)
ఇదీ చదవండి:
