కరోనా మహమ్మారి పుట్టినిల్లుగా చెప్పుకునే చైనాలో మరోసారి వైరస్ల కలకలం మొదలైంది. ఒకటి, రెండు కాదు.. ఏకంగా 71 రకాల వైరస్లను గుర్తించారు అంతర్జాతీయ శాస్త్రవేత్తలు. వీటిలో 18 ప్రమాదకరమైన వైరస్లను గుర్తించారు. చైనాలోని జంతుమాంసం మార్కెట్లే లక్ష్యంగా చైనా, అమెరికా, బెల్జియం, ఆస్ట్రేలియా శాస్త్రవేత్తలు సంయుక్తంగా ఈ పరీక్షలు నిర్వహించారు. 16 రకాల వివిధ జాతులకు చెందిన 1725 వన్య ప్రాణులపై ఈ పరీక్షలు జరిపినట్లు వెల్లడించారు.
చైనా ప్రభుత్వం విక్రయానికి నిషేధించిన పలు జంతువులపైన కూడా శాస్త్రవేత్తలు జరిపారు.
"ఈ పరీక్షల ద్వారా 71 రకాల వైరస్లను గుర్తించాము. అందులో 45 వైరస్లను కొత్తగా కనుగొన్నాము. వీటిలో 18 రకాల వైరస్లు మనుషులకు, జంతువులకు కూడా చాలా ప్రమాదకరమైనవి. వైరస్ల వ్యాప్తిలో వన్యప్రాణులే కీలక పాత్ర పోషిస్తాయి అనడానికి ఈ వివరాలే ఉదాహరణ"
-శాస్త్రవేత్తలు
ఆ జంతువులోనే ఎక్కువ వైరస్లు..
అత్యధికంగా సివెట్స్ అనే జంతువుల్లో ప్రమాదకర వైరస్లను గుర్తించినట్లు శాస్త్రవేత్తలు వెల్లడించారు. గబ్బిలా నుంచి వచ్చే హెచ్కేయూ8 రకం కరోనా వైరస్ ఓ సివెట్కు వ్యాప్తించినట్లు గుర్తించామన్నారు. ఇంకా పలు జంతువుల్లో కూడా ఈ వ్యాప్తి ఉందని పేర్కొన్నారు.
ఇదీ చూడండి : 'సంపద'లో అమెరికాను దాటేసిన చైనా- షాకింగ్ లెక్కలివే...
