అమెరికా కాలిఫోర్నియాలో కార్చిచ్చు బీభత్సం కొనసాగుతోంది. పొడి వాతావరణానికి బలమైన గాలులు తోడవడం వల్ల అంతకంతకూ విజృంభిస్తూ.. రాష్ట్ర చరిత్రలోనే అతిపెద్ద దావానలంగా మారింది. ఉత్తర కాలిఫోర్నియాలోని సుందరమైన అటవీ ప్రాంతాలను దహించివేస్తోంది.
ఉత్తర సియెర్రా నెవాడాలో 370 ఇళ్లు, నిర్మాణాలు ధ్వంసమయ్యాయి. దాదాపు 14,000 భవనాలు కార్చిచ్చు వల్ల ప్రమాదంలో పడ్డాయి. ఇప్పటివరకు 1,813 చదరపు కిలోమీటర్లు మేర దావానలం వ్యాపించినట్లు అధికారులు తెలిపారు.
కార్చిచ్చును అదుపు చేస్తుండగా.. ఓ చెట్టు కొమ్మ విరిగిపడి నలుగురు అగ్నిమాపక సిబ్బంది గాయపడ్డారు. వారిని ఆసుపత్రికి తరలించారు. మరోవైపు సహాయక చర్యలు చేపట్టిన అధికారులు.. ప్రజలను సురక్షిత ప్రాంతాలకు తరలిస్తున్నారు.
దావానలం ధాటికి ఆహుతైన ప్రాంతాలను రాష్ట్ర గవర్నర్ గావిన్ న్యూసోమ్ సందర్శించారు. పరిస్థితి గురించి అధికారులను అడిగి తెలుసుకున్నారు.
