T Hub has been awarded : దేశంలోనే అత్యుత్తమ ఇంక్యుబేటర్​గా టీ హబ్​కి అవార్డు

అందమైన రంగుల రంగుల భవనం... చూడగానే ముచ్చటేస్తుంది. ఇదేదో అమెరికాలో ఉందనుకుంటే మనం పొరపడినట్లే.. ఇది తెలంగాణ రాజధాని హైదరాబాద్‌ నగరం నడిబొడ్డున నూతనంగా నిర్మించిన ఐటీ హబ్‌ భవనం. ఒకేసారి నాలుగు వేలకు పైగా అంకురాలకు వసతి కల్పించేందుకు నిర్మించిన ప్రపంచంలోనే అతిపెద్ద ఆవిష్కరణల ప్రాంగణం టీహబ్‌. హైదరాబాద్‌ రాయదుర్గంలోని నాలెడ్జి సిటీలో రూ.400 కోట్లతో తెలంగాణ ప్రభుత్వం దీన్ని నిర్మించింది. 53.65 మీటర్ల ఎత్తులో (రెండు బేస్‌మెంట్లు, 10 అంతస్తులు.. మూడు ఎకరాల్లో 3.6 లక్షల చదరవు అడుగుల్లో) నిర్మించారు. టీహబ్ అనతి కాలంలోనే అంకురాలకు కేంద్రంగా నిలిచింది. వినూత్న ఆలోచనలున్న ఆవిష్కర్తలను గుర్తించి, విజయవంతమైన స్టార్టప్‌లుగా ఎదిగేందుకు కావాల్సిన సహకారాన్ని ఇక్కడ అందిస్తున్నారు. టీఎస్ఐఐసీ ఆధ్వర్యంలో అత్యున్నత ప్రమాణాలతో, అత్యంత విశాలమైన ప్రాంగణంలో, అత్యాధునిక మౌలిక వసతులతో ఈ భవనాన్ని నిర్మించారు. గతంలోను టీహబ్​కు భారత్‌లో ఉత్తమ ఇంక్యుబేటర్ అవార్డు లభించింది. కేంద్ర ప్రభుత్వం ప్రకటించిన 2022 జాతీయ స్టార్టప్ అవార్డుల్లో ఇంక్యుబేటర్ విభాగంలో టీహబ్​కు ఈ పురస్కారం లభించింది. ఈ మేరకు కేంద్రమంత్రులు పీయూశ్ గోయల్, సోం ప్రకాశ్ దిల్లీలో అవార్డులను ప్రకటించారు.