శివుడికి బతికున్న పీతలతో అభిషేకం చేయడం, పీతలను నైవేద్యంగా సమర్పించడం ఎప్పుడైనా చూశారా. గుజరాత్​లోని సూరత్​లో ఉన్న ఓ శివాలయంలో ఈ అరుదైన దృశ్యాన్ని చూడొచ్చు. ఉమ్రా ప్రాంతంలో ఉన్న రామ్​నాథ్ ఘేలా ఆలయంలో పెద్ద ఎత్తున భక్తులు శివుడికి పీతలను సమర్పించుకుంటారు.

శ్రీరాముడి ఆచారం.. శివలింగానికి పీతలతో అభిషేకం.. ఆ వ్యాధులన్నీ నయం!

live-crabs-offered-shivling-in-surat-gujarat

ప్రతి ఏడాది పౌష ఏకాదశి సందర్భంగా భక్తులు ఇక్కడ బతికి ఉన్న పీతలను నైవేద్యంగా పెడుతుంటారు.

ఇలా చేస్తే చెవులకు సంబంధించిన వ్యాధులు నయమవుతాయని భక్తుల నమ్మకం.

రామ్​నాథ్ ఘేలా ఆలయానికి వెయ్యేళ్ల చరిత్ర ఉందని భక్తులు చెబుతుంటారు.

రాముడు అరణ్యవాసం చేసిన సమయంలో ఇక్కడికి వచ్చాడని అంటుంటారు.

పురాణాల ప్రకారం రాముడు తన విల్లును ఉపయోగించి ఇక్కడ ఓ శివలింగాన్ని తయారు చేసి పూజించాడు.

తన తండ్రి దశరథుడి మరణవార్త గురించి తెలుసుకొని ఈ ప్రాంతంలోనే పితృ తర్పణం చేయాలని అనుకుంటాడు.

అయితే, ఈ కార్యక్రమం నిర్వహించేందుకు బ్రాహ్మణులు ఎవరూ అందుబాటులో ఉండరు.

దీంతో సముద్ర దేవుడిని ప్రార్థించి బ్రాహ్మణుడి రూపంలో వచ్చి తనకు సాయం చేయాలని రాముడు కోరుతాడు.

సముద్ర దేవుడు రాముడి కోరికను మన్నించి బ్రాహ్మణుడి రూపంలో వస్తాడు. అయితే, రాముడు పితృ తర్పణం చేసే సమయంలో సముద్ర దేవుడి శరీరం నుంచి అలలు ఎగసిపడుతుంటాయి.

ఆ అలల్లో నుంచి పీతలు బయటకొచ్చి శివలింగంపై పడతాయి. అప్పుడు సముద్ర దేవుడు ఆ జీవులకు ఎలాంటి హాని చేయొద్దని రాముడిని వేడుకుంటాడు.

అందుకు సరేనన్న రాముడు.. వాటికి తగినంతగా గౌరవిస్తామని చెబుతాడు. అప్పటి నుంచి అక్కడ పీతలను శివలింగానికి ప్రసాదించడం ఆనవాయితీగా వచ్చిందని చెబుతుంటారు.

ఇక్కడి శివలింగానికి పీతలు నైవేద్యంగా సమర్పిస్తే చెవికి సంబంధించిన సమస్యలు తొలగిపోతాయని భక్తులు భావిస్తుంటారు. దీంతో పౌష ఏకాదశి పర్వదినాన ఇక్కడికి వచ్చి పూజలు చేస్తుంటారు.

ప్రపంచంలో ఇలా పీతలను సమర్పించే ఆలయం ఇదొక్కటేనని ఆలయ మహంత్ సోనల్ గోస్వామి తెలిపారు.

చెవి సమస్యలు ఉన్నవారు ఎక్కువగా ఇక్కడికి వస్తుంటారని, సాధారణ భక్తులు సైతం దైవదర్శనానికి పోటెత్తుతారని చెప్పారు.