రాష్ట్రంలో పన్ను బకాయి వసూళ్లకు వన్‌టైం సెటిల్‌మెంట్‌ పథకాన్ని రాష్ట్రప్రభుత్వం ప్రవేశపెట్టింది.

రూ.3 వేల కోట్ల బకాయిల వసూలుకు ఓటీఎస్ పథకం తెచ్చిన ప్రభుత్వం

రాష్ట్రంలో పన్ను బకాయి వసూళ్లకు ఒన్‌టైమ్‌ సెటిల్‌మెంట్‌ పథకాన్ని రాష్ట్రప్రభుత్వం ప్రవేశపెట్టింది. ఈ నెల 16 నుంచి వచ్చే నెల 30 వరకు పన్ను బకాయిదారులు ఆన్‌లైన్‌ ద్వారా దరఖాస్తులు చేసేందుకు గడువు విధిస్తూ ఉత్తర్వులు జారీ చేసింది.

ఈ నెల 16 నుంచి వచ్చే నెల 30 వరకు పన్ను బకాయిదారులు ఆన్‌లైన్‌ ద్వారా దరఖాస్తులు చేసేందుకు గడువు విధిస్తూ ఉత్తర్వులు జారీ చేసింది.

జీఎస్టీ చట్టానికి ముందు పెండింగ్‌ బకాయిల వసూళ్లకు వన్‌టైం సెటిల్‌మెంట్‌ పథకాన్ని ప్రభుత్వం తీసుకొచ్చింది.

జులై 1 నుంచి 15 వరకు దరఖాస్తుల పరిశీలన ఉంటుందని తెలిపింది. జులై 16 నుంచి ఆగస్టు 15 వరకు వన్‌టైం సెటిల్‌మెంట్‌కు అంగీకార పత్రాలు ఇస్తున్నట్లు పేర్కొంది.

కోర్టుల్లో, అప్పిలేట్‌ అథారిటీల వద్ద పెండింగ్‌ ఉన్న కేసుల్లో... మూడు రకాల శాతాల్లో చెల్లించాల్సి ఉంటుందని... మిగిలింది రద్దవుతుందని స్పష్టం చేసింది. ఏపీ జనరల్‌ సేల్స్‌ ట్యాక్స్‌ బకాయి 40శాతం చెల్లిస్తే 60శాతం రద్దు చేస్తామన్న సర్కార్‌... వ్యాట్‌, కేంద్ర అమ్మకపు పన్ను బకాయి 50శాతం చెల్లిస్తే మిగతాది రద్దవుతుందని పేర్కొంది. వాహనాలు, వస్తువులపై ప్రవేశ పన్ను బకాయి 60శాతం చెల్లిస్తే 40శాతం రద్దువుతుందని వెల్లడించింది.

దీని ద్వారా దాదాపు 3 వేల కోట్లు వివిధ పన్నుల పద్దుల కింద పెండింగ్‌ ఉన్నట్లు వెల్లడించింది. ఎలాంటి వివాదం లేని పన్నులు వందశాతం చెల్లించాల్సి ఉంటుందన్న ప్రభుత్వం దానిపై వడ్డీ, పెనాల్టీలు పూర్తిగా రద్దు చేశారు.

బకాయి చెల్లింపుల్లో రూ25 లక్షలు లోపు ఉన్నట్లయితే ఒకేసారి చెల్లింపులు చేయాలని, అంతకంటే ఎక్కువ మొత్తాలు ఉంటే.. నాలుగు సార్లు విడతల వారీగా చెల్లింపునకు అవకాశం ఇచ్చింది. నాలుగు విడతల్లో చెల్లించలేని వారికి ఎక్కువ ఈఎంఐలు చెల్లించేందుకు అవకాశం ఇచ్చినప్పటికీ...ఆ తరువాత చెల్లించేవారికి మొదటి నాలుగు ఈఎంఐలకు ఎలాంటి వడ్డీ ఉండదు. నాలుగు విడతలు దాటి చెల్లించే ఈఎంఐలకు బ్యాంకు వడ్డీ చెల్లించాల్సి ఉంటుందని స్పష్టం చేశారు.

మంగళవారం నుంచి బకాయిదారులకు వన్​టైమ్‌ సెటిల్మెంట్‌ గురించి నోటీసులు ఇవ్వనున్నట్లు వాణిజ్య పన్నుల శాఖ వెల్లడించింది. సర్కిల్‌ స్థాయిలో త్రిసభ్య కమిటీ, సహాయ కమిషనర్‌ స్థాయిలో ద్విసభ్య కమిటీలు ఈ పెండింగ్‌ బకాయిలకు చెందిన దరఖాస్తులను పరిశీలిస్తాయి