పేదరికంలో ఉన్నా కొందరు ప్రతిభావంతులైన విద్యార్థులు జాతీయస్థాయి నీట్‌లో లక్షల మంది నుంచి పోటీ ఎదుర్కొని మంచి ర్యాంకులతో మెరుస్తున్నారు. కన్వీనర్‌ కోటా కింద ఎంబీబీఎస్‌ సీట్లు సాధిస్తున్నారు. ట్యూషన్‌ ఫీజును రీయింబర్స్‌మెంట్‌ రూపేణా సర్కారు మంజూరు చేస్తున్నా, ఇతర ఖర్చులను తలచుకొని ఆ విద్యార్థులు కుమిలిపోతున్నారు. మరికొందరు పేద విద్యార్థులు జాతీయ విద్యాసంస్థలైన ఐఐటీలు, ఐఐఎంలలో సీట్లు పొందుతున్నారు. వారికీ ఎలాంటి చేయూత ఉండటం లేదు. ఇది ఒకరో ఇద్దరో పరిస్థితి కాదు... రాష్ట్రంలోని వేల మంది బీద విద్యార్థుల దీనస్థితి ఇది.

చదువులో మెరికలు.. విద్యార్థులకు ఫీజుల తిప్పలు

చదువులో మెరికలు.. ఫీజుల తిప్పలు

ఏటా ఎంబీబీఎస్‌ కౌన్సెలింగ్‌ మొదలైందంటే చాలు చాలా మంది పేద విద్యార్థులు ఆదుకునే దాతల కోసం ఎదురుచూస్తున్నారు. ప్రభుత్వ వైద్య కళాశాలలో అన్నీ సీట్లు కన్వీనర్‌ కోటా కిందే భర్తీ చేస్తారు. వాటిలో వార్షిక ట్యూషన్‌ఫీజు రూ.10వేలను ప్రభుత్వం బోధనా రుసుంగా చెల్లిస్తుంది. హాస్టల్‌ ఫీజుకు కూడా స్కాలర్‌షిప్‌ అందుతుంది.

ఇక ప్రైవేటు కళాశాలల్లో కన్వీనర్‌ కోటా సీట్లు 50శాతమే ఉంటాయి. అందులో ట్యూషన్‌ఫీజు ఏటా రూ.60 వేలు ఉంటుంది. పేద విద్యార్థులైతే ఆ మొత్తాన్ని కూడా ప్రభుత్వం ఫీజు రీఎంబర్స్‌మెంట్‌ కింద అందజేస్తుంది. అంతవరకు ఇబ్బందిలేదు. ఊరికి దగ్గరగా ఉన్న కళాశాలలో సీటు వచ్చినా సమస్య లేదు. లేకుంటే కళాశాల హాస్టల్‌లో ఉండి చదువుకోక తప్పదు. అందుకు ఏడాదికి కనీసం రూ.లక్ష ఖర్చు అవుతుంది. ఇంకా లైబ్రరీ డిపాజిట్‌వంటి ఫీజులు, పుస్తకాలకు తక్కువలో తక్కువగా రూ.లక్ష అవుతాయి. ప్రవేశాల సమయంలోనే వాటిని చెల్లించాల్సి ఉండడంతో చాలామంది దాతలకోసం ఎదురుచూస్తుంటారు.

నాగర్‌కర్నూల్‌ జిల్లా వెల్దండ మండలానికి చెందిన కొమ్మ సింధూర మహబూబ్‌నగర్‌ జిల్లాలోని వైద్య కళాశాలలో సీటు దక్కించుకుంది. తల్లి పత్తి మిల్లులో కార్మికురాలుగా పనిచేస్తుండగా... తండ్రి ఓ పరిశ్రమలో వాచ్‌మెన్‌. సీటు వచ్చినా తల్లిదండ్రులకు కూతురిని చదివించే ఆర్థిక స్తోమత లేకపోవడంపై ‘ఈనాడు’లో కథనం రావడంతో దాతలు స్పందించారు. ఇప్పటివరకు రూ.3 లక్షల సాయం అందింది. మొత్తానికి కళాశాలలో ప్రవేశం పొందింది.

ఆ నోటా...ఈనోటా విద్యార్థుల ఆర్థిక పరిస్థితి తెలిసి...కొందరు ట్విటర్‌ద్వారా మంత్రుల దృష్టికి తీసుకొస్తున్నారు. మీడియాలో వార్తలొస్తే కొందరు ప్రజాప్రతినిధులు, ఇతరదాతలు తలా ఒకచేయి వేస్తున్నారు. కానీ బయటకు తెలియని మరెంతో మంది ప్రతిభావంతులు నానాపాట్లు పడుతున్నారు. ఏటా కన్వీనర్‌ కోటా కింద దాదాపు 3 వేల మంది వైద్య విద్యలో చేరుతుంటారు. వారిలో పేద కుటుంబాలకు చెందిన వారి చదువుకు ఆటంకాలు లేకుండా చూడాల్సిన బాధ్యత ప్రభుత్వానిదేనని విద్యావేత్తలు చెబుతున్నారు.

‘ఎంబీబీఎస్‌ సీట్లతో పాటు జాతీయ విద్యాసంస్థలైన ఐఐటీలు, ఐఐఎంలలో సీట్లు పొందిన వారికి ఆర్థిక సాయం చేసేందుకు ఒక నిధిని ఏర్పాటు చేస్తే బాగుంటుంది. అవసరమైతే ప్రభుత్వం ఒక విధానం తీసుకురావాలి’ అని మహాత్మాగాంధీ జాతీయ గ్రామీణ విద్యా సంస్థ ఛైర్మన్‌ డాక్టర్‌ డబ్ల్యూజీ ప్రసన్నకుమార్‌ అభిప్రాయపడ్డారు. ఎంవీ ఫౌండేషన్‌ జాతీయ కార్యదర్శి వెంకట్‌రెడ్డి మాట్లాడుతూ ‘ఎంబీబీఎస్‌ సీట్లు కన్వీనర్‌ కోటాలో సాధించిన ఒక్కో విద్యార్థికి ఏటా రూ.2లక్షల చొప్పున సాయంచేసినా వెయ్యిమందికి రూ.20కోట్లు అవసరమవుతాయి.

ఐఐటీలు, ఐఐఎంలు వంటివాటిలో సీట్లు వచ్చిన వారిని పరిగణనలోకి తీసుకుంటే మరోవెయ్యిమంది ఉండొచ్చు. ప్రతిభావంతులైన విద్యార్థులు తమ ఆర్థికపరిస్థితిని తలచుకొని ఆత్మన్యూనతకు గురికాకుండా ప్రభుత్వం నుంచి ఆర్థిక సాయం అందేలా  చర్యలు చేపట్టాలి’ అని అన్నారు. ‘ఐఐటీల్లో ఎస్‌సీ, ఎస్‌టీలకు ఫీజు మాఫీ చేస్తారు. మిగిలిన వారికి సున్నా వడ్డీతో బ్యాంకు రుణాలిస్తారు’ అని ఐఐటీ దిల్లీ మాజీ సంచాలకుడు ఆచార్య రాంగోపాల్‌రావు తెలిపారు. ఎస్‌సీ, ఎస్టీయేతర్లకు కొన్నిస్కాలర్‌షిప్‌లు కూడా ఉంటాయన్నారు.

నాగర్‌కర్నూల్‌ జిల్లా వెల్దండ మండలానికి చెందిన సృజన ఎస్సీ కేటగిరీ కింద హైదరాబాద్‌  శివారులోని ఓ కళాశాలలో కన్వీనర్‌ కోటాలో ఎంబీబీఎస్‌ సీటు సాధించింది. తల్లి అంగన్‌వాడీ కార్యకర్తగా పనిచేస్తుండగా...తండ్రి ప్రాంక్లిన్‌ ఆటోడ్రైవర్‌. కళాశాలలో హాస్టల్‌ ఫీజుకు రూ.1.10 లక్షలు, ఇతర రుసుములకు మరో రూ.లక్ష చెల్లించారు. అందులో దాతలు రూ.లక్ష వరకు సాయం చేశారు. మిగతావి అప్పులు చేసి చెల్లించారు.

వరంగల్‌ జిల్లా నెక్కొండ మండలం నాగారం గ్రామానికి చెందిన అనూష కరీంనగర్‌లోని ఓ ప్రైవేట్‌ కళాశాలలో కన్వీనర్‌ కోటా కింద ఎంబీబీఎస్‌ సీటు సాధించింది. హాస్టల్‌ ఫీజులు చెల్లించలేని పరిస్థితి ఉండడంతో తరగతులకు హాజరుకాకుండా ఇంటి వద్దే ఉంటోంది. దీనిపై పత్రికల్లో కథనాలు వెలువడంతో నల్గొండ ఎంపీ కోమటిరెడ్డి వెంకట్‌రెడ్డి స్పందించి ప్రతీక్‌ ఫౌండేషన్‌ తరఫున రూ.2.14 లక్షలు అందజేశారు.