ఆదిలాబాద్ జిల్లా సిరికొండ మండలం లచింపుర్ బి గ్రామానికి చెందిన భారత్ ఎప్పటిలాగే మంగళవారం తన ఆవులను మేత కోసం వదిలాడు. స్థానికంగా ఉన్న అడవిలో మేత మేసేందుకు వెళ్లిన ఆవు రెండు రాళ్ల మధ్యలో ఉన్న ఇప్ప పరకను తిందామనుకుంది.

ఎరక్కపోయి.. ఇరుక్కున్న ఆవు

ఆకలి.. మనిషితో ఏ పనైనా చేయిస్తుంది. కేవలం మనిషే కాదు ఏ జీవీ ఆకలికి మినహాయింపు కాదు. గుప్పెడు మెతుకు కడుపులో పడేందుకు జీవులు నానాతంటాలు పడుతుంటారు. అలా ఆహారం కోసం ఓ మూగజీవి పడిన వేదన అంతా ఇంతా కాదు.

ఎండాకాలం వస్తే మనుషులే కాదు.. మూగజీవాలకూ నరకమే. నీళ్లు లేక మానవులే కాదు జంతువులూ ఇబ్బందులు పడతాయి. ఈ వేసవిలో ఎండ దంచికొడుతోంది. చాలా ప్రాంతాల్లో నీరు కరవైంది. ఎక్కడ చూసినా ఎండిపోయిన గడ్డి.. మాడిపోతున్న వృక్షాలే కనిపిస్తున్నాయి.

ఈ ఎండ దెబ్బకు అడవుల్లోనూ మూగజీవాలకు ఆహారం కరవైంది. కొన్ని ప్రాంతాల్లో ఇప్ప చెట్ల నుంచి కిందపడుతున్న ఇప్ప పరకతోనే పశువులు కడుపు నింపుకుంటున్నాయి. అలా ఆహారం కోసం చూస్తూ అటూ ఇటూ తిరిగిన ఓ ఆవు ఇప్ప పరక కనిపించగానే ఆబగా దాన్ని తిందామని వెళ్లింది. కానీ ఆకలి బాధలో దానికి అక్కడున్న ప్రమాదం కనిపించలేదు.

ఇప్ప పరకను తినే క్రమంలో రాళ్ల సందులో ఆవు తల ఇరుక్కుంది. ఎంత ప్రయత్నించినా తల బయటకు రాక ఆవు తల్లడిల్లింది. గమనించి ఆవుల కాపరి గ్రామస్థుల సాయంతో దాదాపు రెండు గంటల పాటు శ్రమించి ఆవు తలను బయటకు తీశారు.