'నా పేరు ఇందుషా తుమ్మల.. మాది విజయవాడ. డిగ్రీ చదివినా ఆర్థిక ఇబ్బందుల కారణంగా ఇంకా పెళ్లి కాలేదు. ఫేస్‌బుక్‌ ద్వారా మీరు పరిచయమయ్యాక మిమ్మల్ని పెళ్లిచేసుకుందామని నిర్ణయించుకున్నాను. మీ వయస్సు నాకంటే రెట్టింపైనా నాకు అభ్యంతరం లేదు. ఏదైనా దేవాలయానికి వెళ్లి ఇద్దరం ఒక్కటవుదాం.' ఇలా యువతిలా మాట్లాడుతూ ఓ వ్యాపారి నుంచి దాదాపు కోటిన్నర స్వాహా చేశాడు ఓ కేటుగాడు.

యూట్యూబ్​లో ఆ వీడియో చూశాడు.. వ్యాపారి నుంచి రూ. 45 లక్షలు కొల్లగొట్టాడు

సైబర్​ నేరాల పట్ల పోలీసులకు ఎంత అవగాహన కల్పిస్తున్నా.. మోసాలు మాత్రం ఆగడం లేదు. కేటుగాళ్లు రోజుకో కొత్త పంథాలో బాధితులను బలి చేస్తూనే ఉన్నారు. తాజా వాయిస్​ ఛేంజ్​ యాప్​ ద్వారా వ్యాపారికి వలపు వల విసిరి పెళ్లి చేసుకుందామని నమ్మించి రెండేళ్లలో రూ. 45 లక్షలు కొల్లగొట్టాడో కేటుగాడు.

రెండేళ్ల క్రితం యూట్యూబ్​లో చూసిన క్రైమ్ వార్తనే ఇతనికి స్పూర్తి. వాయిస్​ ఛేంజ్ యాప్​తో ఓ వ్యక్తిని బురిడీ కొట్టించిన మోసగాడిని ఆదర్శంగా తీసుకుని రెండేళ్లుగా ఆ వ్యాపారిని విరహ వేదనలో ముంచెత్తాడు.

ఏపీలోని ఏలూరు జిల్లా నూజివీడుకు చెందిన మోతే అశోక్..​ బీటెక్ మధ్యలోనే చదువున ఆపేశాడు. చెడు అలవాట్లకు బానిసై సులభంగా డబ్బు సంపాదించడం కోసం మోసాలు చేయాలని భావించాడు. అందుకోసం యూట్యూబ్​ వీడియోలు చూసేవాడు.

ఇదే క్రమంలో యూట్యూబ్​లో ఓ వార్త అతడిని ఆకర్షించింది. వాయిస్​ ఛేంజర్​ యాప్​ ద్వారా యువతిగా మాట్లాడుతూ నేరాలు చేయడం ఎలాగో తెలుసుకున్నాడు. ఇక ఓ యువతి ఫొటోను ప్రొఫైల్​ పిక్​గా పెట్టుకుని 'వాయిస్​ ఛేంజ్​' యాప్​ ఇన్​స్టాల్​ చేసుకున్నాడు.

హైదరాబాద్​ జూబ్లీహిల్స్​లోని ఓ వ్యాపారికి ఫ్రెండ్​ రిక్సెస్ట్​ పంపాడు. ఆ వ్యాపారి యాక్సెప్ట్​ చేశాక.. పరిచయాలు పెరిగాక.. ఫోన్​లో మాట్లాడుకున్నారు. సందేహం రాకుండా వాయిస్​ ఛేంజ్​ యాప్​తో యువతిలా మాట్లాడుతూ.. తీయని మాటలతో ఆకర్షించాడు.

అంతేకాదు పలుమార్లు విజయవాడకు రమ్మని అక్కడ ఏకాంతంగా గడుపుదామంటూ ఆహ్వానించాడు. వ్యాపారి వెళ్లడానికి సిద్ధమయ్యేటప్పటికి వేరే పనులున్నాయంటూ దాటవేసేవాడు. ఇలాగే మాట్లాడుకుంటూ కొన్ని రోజుల తర్వాత అశోక్​ అలియాస్​ ఇందుషా.. పెళ్లి ప్రస్తావన తెచ్చాడు. ఆ వ్యాపారి వెంటనే అంగీకరించాడు.

ఇందుషాతో పెళ్లి ఊహల్లో తేలిపోయిన వ్యాపారికి.. ఇక అతను ఏం అడిగినా కాదనలేక పోయాడు. అలా ఓ సారి కాలేజీ ఫీజు పేరుతో రూ. 3 లక్షలు ఖాతాలో వేయించుకున్నాడు.

కరోనా కష్టకాలం కూడా అశోక్​కు బాగా కలిసొచ్చింది. 'మా అమ్మకు కరోనా సోకిందం'టూ మొదటి వేవ్​లో రూ. 10 లక్షలు, రెండో వేవ్​లో తనకు కొవిడ్​ అంటూ మరో రూ. 15 లక్షలు వైద్య ఖర్చుల పేరుతో కాజేశాడు. ఇలా రెండేళ్లలో రూ. 45 లక్షలు కొల్లగొట్టాడు.

ఎప్పుడూ డబ్బులడుగుతుందే కానీ.. ఒక్కసారైనా ఇందుషా కలవదే అని అనుమానం వచ్చిన.. వ్యాపారి తనకు ఫోను చేశాడు. ఈ సారి ఫోన్​ స్విచాఫ్​ వచ్చింది. మోసపోయానని తెలుసుకున్న బాధితుడు.. 20 రోజుల క్రితం పోలీసులకు ఫిర్యాదు చేశాడు.

సైబర్​ క్రైమ్​ ఇన్‌స్పెక్టర్‌ జి.వెంకటరామిరెడ్డి దర్యాప్తు చేపట్టి సాంకేతిక ఆధారాల సాయంతో నిందితుడిని గుర్తించారు. నూజివీడుకు వెళ్లి బుధవారం అదుపులోకి తీసుకున్నారు. రూ.45 లక్షల్లో రూ.43 లక్షలు ఆన్‌లైన్‌ గేమింగ్‌, మద్యానికి ఖర్చు చేశాడని పోలీసులు గుర్తించారు. మిగిలిన రూ.2 లక్షలతో పాటు నేరానికి వాడిన ఫోన్‌ రికవరీ చేశారు.

సామాజిక మాధ్యమాల్లో గుర్తు తెలియని వారి నుంచి వచ్చే ఫ్రెండ్ రిక్వెస్ట్​లను అంగీకరించవద్దని పోలీసులు పదే పదే హెచ్చరిస్తున్నారు. కానీ పోలీసుల హెచ్చరికలు పాటించని వారు మోసపోతూనే ఉన్నారు.

యూట్యూబ్​లో ఆ వీడియో చూశాడు.. వ్యాపారి నుంచి రూ. 45 లక్షలు కొల్లగొట్టాడు

యూట్యూబ్లో ఆ వీడియో చూశాడు.. వ్యాపారి నుంచి రూ. 45 లక్షలు కొల్లగొట్టాడు