పుట్టినరోజు వేడుకలో జరిగిన ఘర్షణ ఓ నిండు ప్రాణాన్ని బలికొంది. భార్యను దూషించాడనే కోపంతో పగ పెంచుకొన్న భర్త... ఆ వ్యక్తిని హతమార్చేదాక నిద్రపోలేదు. మాయమాటలు చెప్పి మద్యం తాగించి.. ఘర్షణకు దిగి బండ రాయితో కొట్టి హత్యచేసిన ఘటన సూర్యాపేట జిల్లా కోదాడ పట్టణంలో చోటు చేసుకుంది.
ఆంధ్రప్రదేశ్లోని కృష్ణా జిల్లా వత్సవాయి మండలం గోపీనేనిపాలెంకు చెందిన రమేశ్... ఈనెల ఆరో తేదీన సూర్యాపేట జిల్లా కోదాడలో అనుమాస్పద స్థితిలో మృతిచెందాడు. కేసు నమోదు చేసుకున్న పోలీసులు విచారణను చేపట్టి హత్య కేసును ఛేదించారు. కోదాడ పట్టణ సీఐ నరసింహారావు తెలిపిన వివరాల ప్రకారం... వత్సవాయి మండలానికి చెందిన బొబ్బిలిపాటి రమేశ్... అదే మండలానికి చెందిన గంటసాల వెంకటేశ్వర్ల భార్య పుట్టినరోజు వేడుకకు వెళ్లాడు. వేడుకలో రమేశ్, వెంకటేశ్వర్లుకు మధ్య తీవ్ర ఘర్షణ జరిగింది. ఈ క్రమంలో రమేశ్... వెంకటేశ్వర్ల భార్యను తీవ్రంగా దూషించాడు.
ప్రణాళిక ప్రకారం..
తన భార్యను దూషించాడని జీర్ణించుకోలేకపోయిన వెంకటేశ్వర్లు... రమేశ్ను ఎలా అయినా అంతమొందించాలనుకున్నాడు. దీనికోసం ప్రణాళిక కూడా వేసుకున్నాడు. రమేశ్కు మాయమాటలు చెప్పి... కోదాడకు ద్విచక్రవాహనంపై తీసుకెళ్లాడు. అక్కడ మద్యం తాగారు. తిరుగు ప్రయాణంలో రమేశ్తో వెంకటేశ్వర్లు ఘర్షణకు దిగాడు. కాలితో తన్ని... విచక్షణారహితంగా బండరాయితో కొట్టి చంపి పరారయ్యాడు.
ఉదయం పట్టణం సమీపంలోని ఓ వెంచర్లో రమేశ్ మృతదేహం స్థానికుల కంటపడింది. వారు పోలీసులకు సమాచారం ఇవ్వగా.. ఘటనాస్థలానికి చేరుకుని గుర్తు తెలియని మృతదేహంగా కేసు నమోదు చేసుకుని దర్యాప్తు ప్రారంభించారు. రమేశ్ అన్న బొబ్బిలపాటి శ్యాంబాబు ఫిర్యాదు మేరకు పోలీసులు కేసును ఛేదించి... వెంకటేశ్వర్లను అదుపులోకి తీసుకుని రిమాండ్కు తరలించారు. భార్యను దూషించినందుకే హత్య చేసినట్లు వెంకటేశ్వర్లు ఒప్పుకున్నాడని... కోదాడ పట్టణ సీఐ నరసింహరావు వెల్లడించారు. నిందితుడిపై గతంలో కూడా హత్యాయత్నం, దొంగతనం కేసులు ఉన్నాయని తెలిపారు. నిందితుడు నుంచి ఓ ద్విచక్రవాహనం, చరవాణి హత్యకు వినియోగించిన బండ రాయిని పోలీసులు స్వాధీనం చేసుకున్నారు.
ఇదీ చూడండి: చెల్లిని ప్రేమ పేరుతో వేధిస్తున్నాడని.. యువకునిపై అన్న దాడి
