Baby Boy Kidnap: సూర్యాపేట జిల్ చివ్వెంల మండలం దురాజ్పల్లిలో నాలుగు నెలల మగ శిశువు కిడ్నాప్ సంచలనంగా మారింది. తల్లిదండ్రుల మధ్య నిద్రిస్తున్న 4 నెలల బాబును ఆదివారం గుర్తు తెలియని దుండగులు అపహరించారు. బాబు ఇమ్మారెడ్డి శివ(4) కనిపించట్లేదని కంగారు పడిన తల్లిదండ్రులు వెంటనే చివ్వెంల పోలీస్ స్టేషన్లో ఫిర్యాదు చేశారు. కేసు నమోదు చేసుకున్న పోలీసులు దర్యాప్తు చేపట్టారు. సూర్యాపేట డీఎస్పీ మోహన్ కుమార్ నేతృత్వంలో 5 బృందాలతో శిశువు ఆచూకీ కోసం గాలిస్తున్నారు. సంఘటనపై చివ్వెంల పోలీసులు పలువురు అనుమానితులను అదుపులోకి తీసుకుని విచారిస్తున్నారు.
నాలుగు నెలల శిశువు అపహరణ పోలీసులకు సవాలుగా మారింది. నూతనకల్ మండల కేంద్రానికి చెందిన ఇమ్మారెడ్డి సైదిరెడ్డి , విజయ దంపతులు గత కొన్ని నెలలుగా దురాజ్ పల్లి లింగమంతుల స్వామి దేవాలయం సమీపంలో గుడారం వేసుకుని నివాసముంటున్నారు. వీరికి ఇద్దరు కూతుళ్లు ఉండగా.. ఇటీవల ఓ కుమారుడికి జన్మనిచ్చారు. వీరు కొద్దిపాటి మానసిక రుగ్మతతో బాధపడుతున్నారు. లింగమంతుల స్వామి గుడి వద్ద కొబ్బరికాయలు విక్రయించి జీవనం సాగిస్తున్నారు. ఈ దంపతుల కుమారుడిని అపహరించాల్సిన అవసరం ఎవరికి ఉందన్న కోణంలో పోలీసులు ఆరా తీస్తున్నారు.
సైదిరెడ్డి స్వగ్రామం నూతనకల్ మండల కేంద్రంలో ఆయన తల్లిదండ్రుల ఆస్తి నుంచి రావాల్సిన భూవాటా వివాదం ఏమైనా శిశువు కిడ్నాప్నకు కారణమై ఉంటుందా అన్న కోణంలో పోలీసులు దర్యాప్తు చేపట్టారు. ఇటీవల ఓ వ్యక్తి బాధిత కుటుంబంతో పలుమార్లు వారి శిశువును విక్రయించాలని కోరినట్లు పోలీసులు గుర్తించారు. ఆ వ్యక్తిని అదుపులోకి తీసుకుని విచారించగా.. అతడి పాత్రలేదని తేల్చుకున్నారు. పరిసర ప్రాంతాలను గాలించిన పోలీసులు మానసిక రుగ్మతతో బాధపడుతున్న తల్లిదండ్రులు ఏమైనా చేశారా అన్న కోణంలో కూడా పోలీసులు అనుమానిస్తున్నారు. ఈ కేసును చేధించేందుకు డీఎస్పీ మోహన్ కుమార్ చివ్వెంల పోలీస్ స్టేషన్లోనే ఉండి పర్యవేక్షిస్తున్నారు.
ఇదీ చదవండి:నగర శివారులో నగ్నంగా జంట దారుణ హత్య.. యువకుడి మర్మాంగాలను ఛిద్రం చేసి..!
