ACB Raids: అబ్కారీశాఖలో అవినీతి చేపను అనిశా అధికారులు రెడ్ హ్యాండెడ్గా పట్టుకున్నారు. ఓ వ్యక్తి ఫిర్యాదుతో రంగంలోకి దిగిన అనిశా అధికారులు నల్గొండ జిల్లా హాలియా ఎక్సైజ్ సీఐ యమునాధర్రావును అదుపులోకి తీసుకున్నారు. వైన్స్ షాప్ నిర్వహణ కోసం 8 నెలలకు గాను రూ.2 లక్షలు లంచం తీసుకుంటూ అనిశా అధికారులకు చిక్కాడు. అవినీతిపై పూర్తిస్థాయిలో దర్యాప్తు చేస్తున్నట్లు జిల్లా ఏసీబీ డీఎస్పీ కృష్ణ గౌడ్ తెలిపారు. ఏక కాలంలో హైదరాబాద్లోని కొత్తపేటలో ఉన్న అతని నివాసంలో సోదాలు జరుపుతున్నట్లు కృష్ణ గౌడ్ వెల్లడించారు.
హైదరాబాద్ సరూర్నగర్లో ఉండే నూకల విద్యాసాగర్ రెడ్డికి భార్య సునీత పేరు మీద లాటరీ పద్ధతి ద్వారా 2021 డిసెంబర్లో నల్లగొండ జిల్లా తిరుమలగిరి సాగర్లో వైన్స్ షాప్ వచ్చింది. అప్పటి నుంచి షాప్ సక్రమంగా నడవాలంటే నెలకు 25 వేల రూపాయలు ఇవ్వాలని హాలియా ఎక్సైజ్ సిఐ యమునాధర్ రావు డిమాండ్ చేశాడు. దాంతో అతని వేధింపులకు భయపడిన విద్యాసాగర్ రెడ్డి 8 నెలలకు గాను 2 లక్షల రూపాయలు ఇవ్వడానికి ఒప్పుకున్నాడు. పక్కా ప్రణాళికతో ఏసీబీని ఆశ్రయించాడు. దాంతో ఈ రోజు విద్యాసాగర్ రెడ్డి నల్లగొండ ఎక్సైజ్ స్టేషన్ వద్ద సీఐ వెంకటేశ్వర్లు వాహనంలో డబ్బులు పెట్టడాన్ని చూసిన ఏసీబీ అధికారులు రెడ్ హ్యాండెడ్గా పట్టుకున్నారు.
ఇవీ చదవండి:పారిపోయిన ప్రేమజంట.. యువకులను చితకబాదిన సర్పంచ్.. మనస్తాపంతో..!
