Casino Case in Hyderabad: క్యాసినో వ్యవహారంలో ఈడీ అధికారుల దర్యాప్తు ముమ్మరంగా సాగుతోంది. ఈ కేసులో తెలుగురాష్ట్రాలకు చెందిన పలువురు మంత్రులు, ఎమ్మెల్యేల పాత్రపై ఈడీ అధికారులు ఆరా తీస్తుండగా.. పలు ఆసక్తికర అంశాలు వెలుగులోకి వస్తున్నాయి. ఈ వ్యవహారంలో కీలక వ్యక్తి ఏజెంట్ చీకోటి ప్రవీణ్ను విచారిస్తున్న ఈడీ అధికారులు.. అతడి చరవాణిలో పలు వాట్సాప్ చాటింగ్లను గుర్తించారు. ఈ మేరకు వాటి వివరాలు సేకరిస్తున్నారు. ఇందులో పలువురు ఎమ్మెల్యేల నెంబర్లను ఈడీ గుర్తించింది. నేపాల్లో నిర్వహించిన క్యాసినోకు నగదును తీసుకెళ్లిన ప్రవీణ్.. ఫెమా నిబంధనలు ఉల్లంఘించినట్లు ఈడీ అధికారుల దర్యాప్తులో తేలింది. ఈ వ్యవహారంలో ఒకవేళ ఎమ్మెల్యేలకు సంబంధం ఉందని తేలితే మాత్రం.. ఆయా నాయకులకు ఈడీ అధికారులు నోటీసులు ఇచ్చే అవకాశం ఉంది.
ప్రస్తుతానికైతే ప్రవీణ్, మాధవరెడ్డి బ్యాంకు ఖాతాలను పరిశీలిస్తున్న ఈడీ అధికారులు లావాదేవీలపైనే దృష్టి కేంద్రీకరించారు. ఫెమా నిబంధనలు ఉల్లంఘించినట్లు తేలితే... ఆ డబ్బును ఏం చేశారనే కోణంలో ఆరా తీస్తారు. డబ్బుతో బంగారం లేదా... స్థిరాస్తులు కొనుగోలు చేస్తే మనీలాండరింగ్ కేసు నమోదు చేసి, ఆయా ఆస్తులను జప్తు చేసే అవకాశం ఉంటుంది. ప్రవీణ్ లాప్టాప్, చరవాణీలను రామాంతపూర్లోని సెంట్రల్ ఫోరెన్సిక్ సైన్స్ ల్యాబోరేటరీకి పంపించి.. డేటా రిట్రైవ్ చేస్తున్నారు. ఈ క్రమంలో పలు వాట్సాప్ చాటింగ్లు బయటికి వచ్చాయి. ప్రవీణ్ బ్యాంక్ లావాదేవీలకు సంబంధించి పూర్తి స్పష్టత వచ్చాక.. మిగతా అంశాలపై ఈడీ అధికారులు దృష్టి సారించే యోచనలో ఉన్నారు.
ఇవీ చూడండి:
