తమిళనాడు వెల్లూరు జిల్లా ఎస్పీ సమయస్ఫూర్తి ప్రదర్శించారు. కత్తులతో బెదిరించి దోపిడీకి పాల్పడుతున్న ముగ్గురు యువకులను రెడ్ హ్యాండెడ్గా పట్టుకున్నారు. ఈ వీడియో సామాజిక మాధ్యమాల్లో వైరల్గా మారింది.
టాటూలు వేస్తూ జీవనం సాగిస్తున్న సతీష్(21) రోజూమాదిరిగానే వెల్లూరులోని గ్రీన్ సర్కిల్ ప్రాంతంలో పనిచేసుకుంటున్నాడు. ఆ సమయంలో సెల్వన్ పట్టి ప్రాంతానికి చెందిన కిషోర్, మరో ఇద్దరు యువకులు సతీష్ను కత్తులతో బెదిరించారు. బాధితుని వద్ద నుంచి బలవంతంగా రూ.1200 వసూలు చేశారు. అదే సమయంలో స్థానిక ఎస్పీ సెల్వ కుమార్ కారులో ప్రయాణిస్తూ ఈ ఘటనను చూశారు. వెంటనే కారు ఆపి దోపిడీకి పాల్పడినవారిని పట్టుకోవడానికి ప్రయత్నించారు. నిందితులు పారిపోవడానికి ప్రయత్నించగా.. పోలీసులు వెంబడించి వారిని పట్టుకున్నారు. దీంతో ఎస్పీ సెల్వ కుమార్పై స్థానికులు ప్రశంసలు కురిపించారు.
పోలీసులు నిందితుల నుంచి రూ.1200, కత్తులను స్వాధీనం చేసుకున్నారు.
ఇదీ చదవండి:కటింగ్ చేయలేదని బార్బర్ను కాల్చి చంపాడు
