బిహార్‌లోని పట్నా జైలు నుంచి తప్పించుకున్న ముగ్గురు నేరస్థుల్లో ఇద్దరు ఎన్కౌంటర్లో మృతి చెందారు. ఉత్తరప్రదేశ్‌లోని వారణాసిలో జరిగిన ఎన్కౌంటర్లో ఆ నేరస్థులు మరణించినట్లు అక్కడి పోలీసులు తెలిపారు. చనిపోయిన నిందితులిద్దరూ సోదరులని.. పట్నా జైలు నుంచి తప్పించుకుని ఉత్తర్‌ప్రదేశ్‌లో పలు నేరాలకు పాల్పడ్డారని వెల్లడించారు.
బడగావ్ ప్రాంతంలో నవంబర్ 8వ తేదీనా వీరు ఒక పోలీసు అధికారిని గాయపరిచి సర్వీస్ పిస్టల్‌ను దొంగిలించారని వివరించారు. ఈ కేసులో విచారణ జరుగుతుండగా నిందితులు పారిపోవడానికి ప్రయత్నించారాని పోలీసులు చెప్పారు. ఈ క్రమంలోనే ఇరువురి మధ్య కాల్పులు జరగ్గా.. నిందితులు తీవ్రంగా గాయపడ్డారని పోలీసులు పేర్కొన్నారు. ఆస్పత్రికి తరలించగా చికిత్స పొందుతూ ఇద్దరూ మృతి చెందినట్లు తెలిపారు. ఈ ఘటనలో మరో నిందితుడు పారిపోయాడని వెల్లడించారు. బిహార్ పోలీసులు ఇచ్చిన సమాచారం ప్రకారం ముగ్గురు నిందితులు కరుడుగట్టిన నేరస్థులని ఉత్తర్‌ప్రదేశ్‌ పోలీసులు తెలిపారు.
