NIA raids today: అండర్ వరల్డ్ డాన్ దావూద్ ఇబ్రహీం, అతడి ముఠాకు సంబంధించి వ్యవహారాలపై విచారణ ముమ్మరం చేసింది జాతీయ దర్యాప్తు సంస్థ ఎన్ఐఏ. కేంద్ర హోంశాఖ ఆదేశాల మేరకు.. ముంబయిలోని సుమారు 20 ప్రాంతాల్లో సోమవారం సోదాలు నిర్వహించింది. 'డి' కంపెనీపై నమోదు చేసిన కేసులో విచారణ ముమ్మరం చేసినట్లు అధికారులు తెలిపారు. నాగ్పాడ, గోరెగావ్, బోరివలి, సాంటాక్రూజ్, ముంబ్రా, భిండి బజార్ వంటి కీలక ప్రాంతాల్లో ఈ సోదాలు జరిగినట్లు వెల్లడించారు.
నవాబ్ మాలిక్‌కు సంబంధించిన ఎఫ్‌ఐఆర్‌లోని చాలా మంది అనుమానితులను కనుగొనే ప్రయత్నంలో ఉన్నట్లు ఎన్ఐఏ వర్గాల వెల్లడించాయి. అండర్ వరల్డ్ డాన్ కోసం ముంబయి కేంద్రంగా హవాలా వ్యాపారులు పని చేస్తున్నట్లు సమాచారం అందినట్లు పేర్కొన్నాయి. ఈరోజు జరిగిన దాడుల్లో ఎక్కువమంది హవాలా వ్యాపారుల నివాసాలు, కార్యాలయాలు ఉన్నట్లు వెల్లడించాయి. దావూద్కు చెందిన డి కంపెనీని ఉగ్రవాద సంస్థగా, 1993 ముంబయి వరుస పేలుళ్ల సూత్రధారిని అంతర్జాతీయ ఉగ్రవాదిగా 2003లో ప్రకటించింది అమెరికా.
ఎన్ఐఏ అదుపులోకి కీలక వ్యక్తులు: దావూద్ కేసులో సోమవారం విస్తృత సోదాలు నిర్వహించిన జాతీయ దర్యాప్తు సంస్థ ఎన్ఐఏ.. గ్యాంగ్స్టర్ చోటా షకీల్ అనుచరుడు, అతని సోదరి భర్త సలీమ్ ఖురేషి అలియాస్ సలీమ్ ఫ్రూట్ను అదుపులోకి తీసుకుంది. దక్షిణ ముంబయి, భెండి బజార్లోని నివాసంలో అదుపులోకి తీసుకున్నట్లు అధికారులు తెలిపారు. కీలకమైన పత్రాలను సీజ్ చేశామన్నారు. సలీమ్తో పాటు మహిమా ప్రాంతానికి చెందిన ఖయ్యుమ్, మహిమ్ దర్గా మేనేజింగ్ డైరెక్టర్ సుహేల్ కంద్వానీ, బంద్రాలోని డిలైట్ అపార్ట్మెంట్లో సమీర్ అంగోరాను అదుపులోకి తీసుకుంది ఎన్ఐఏ.
ఇదీ చూడండి: 'హైబ్రిడ్ ఉగ్రవాదుల కేసు'లో 25మందిపై ఎన్ఐఏ ఛార్జ్షీట్
