Gujarat Elections 2022: గుజరాత్ అసెంబ్లీ ఎన్నికల నేపథ్యంలో ప్రధాని మోదీ రాష్ట్రవ్యాప్తంగా పర్యటించి అనేక ప్రాజెక్టులకు శంకుస్థాపనలు చేశారు. పూర్తయిన వాటిని ప్రారంభించారు. అనేక సభల్లో ప్రసంగించారు. ఎన్నికల తేదీలు ప్రకటించడానికి ముందు నెలల్లో రాష్ట్ర పర్యటనల్లో రికార్డు సృష్టించారు. గతంలో ఏ ప్రధానమంత్రీ ఒక రాష్ట్రంలో ఇన్ని యాత్రలు జరిపి ఉండకపోవచ్చు. మోదీని ఢీకొట్టేందుకు కాంగ్రెస్‌ సహా ఏ ప్రతిపక్షమూ గట్టి ప్రయత్నం చేస్తున్నట్లు కనిపించడంలేదు. అయితే, ఆమ్‌ ఆద్మీ పార్టీ (ఆప్‌) బరిలో దిగినప్పటి నుంచి పరిస్థితి వేడెక్కింది.
భాజపా పైచేయి
గుజరాత్‌లో ఇంతకాలం కాంగ్రెస్‌ పార్టీయే భాజపాకు ప్రధాన పోటీదారుగా నిలిచింది. పటిష్ఠ నాయకత్వం లేకపోవడం, సంస్థాగతంగా సమన్వయంతో కృషి జరపకపోవడం వల్ల హస్తం పార్టీ వరసగా ఓటములు చవిచూస్తూ వచ్చింది. దీనివల్ల గుజరాత్‌లో ఏర్పడిన రాజకీయ శూన్యాన్ని భర్తీ చేయడానికి ఆప్‌ ప్రయత్నిస్తోంది.
కాంగ్రెస్‌ ఇప్పటిదాకా జరిగిన ఏ ఎన్నికల్లోనూ ముఖ్యమంత్రి అభ్యర్థిని ముందుగా ప్రకటించలేదు. పూర్వాశ్రమంలో పాత్రికేయుడైన ఇసుదాన్‌ గఢ్వీని తమ ముఖ్యమంత్రి అభ్యర్థిగా ఆప్‌ ఎంపిక చేసింది. భాజపాకు మెజారిటీ వస్తే భూపేంద్ర పటేలే సీఎంగా కొనసాగుతారని కేంద్ర హోంమంత్రి అమిత్‌ షా ప్రకటించారు. అయితే, పార్టీ పరంగా దానిపై సాధికార ప్రకటన వెలువడలేదు.
గుజరాత్ తొలి అసెంబ్లీ ఎన్నికలు 1962లో జరిగాయి. అప్పుడు కాంగ్రెస్‌ అధికారంలోకి వచ్చింది. గుజరాత్ రెండో ముఖ్యమంత్రి బల్వంత్‌రాయ్‌ మెహతా 1965లో కచ్‌ సరిహద్దు వెంబడి విమానంలో ప్రయాణిస్తుండగా, దాన్ని పాక్‌ కూల్చేయడంతో మరణించారు. 1971 నుంచి గుజరాత్‌లో నాలుగుసార్లు రాష్ట్రపతి పాలన విధించారు. 1973లో అవినీతికి వ్యతిరేకంగా గుజరాత్ విద్యార్థులు నిర్వహించిన నవ నిర్మాణ్‌ ఉద్యమం అప్పటి కాంగ్రెస్‌ ముఖ్యమంత్రి చిమన్‌భాయ్‌ పటేల్‌ రాజీనామాకు దారితీసింది.
1975లో బాబూభాయ్‌ జశ్‌భాయ్‌ పటేల్‌ నాయకత్వంలోని జనతా మోర్చా గుజరాత్‌లో మొట్టమొదటి కాంగ్రెసేతర ప్రభుత్వాన్ని ఏర్పాటు చేసింది. తరవాత కొద్దినెలలకే ఆత్యయిక పరిస్థితి కారణంగా ఆయన ప్రభుత్వం కూలిపోయి రాష్ట్రపతి పాలన వచ్చింది. 1980లో మాధవ్‌ సింహ్‌ సోలంకీ నాయకత్వంలో కాంగ్రెస్‌ అధికారంలోకి వచ్చింది. 1985 ఎన్నికల్లో 149 అసెంబ్లీ సీట్లతో గెలిచింది. పలు సామాజిక వర్గాల ఓటు బ్యాంకును కూడగట్టడం ద్వారా భారీ విజయం సాధ్యపడింది.
కాంగ్రెస్‌కు 1980ల్లో లాభించిన ఓటు బ్యాంకు రాజకీయాలు 1990లకు వచ్చేసరికి ఎదురుతన్నాయి. ఆ తరహా రాజకీయాలతో పటేల్‌ సామాజిక వర్గం కాంగ్రెస్‌కు దూరమైంది. వారితోపాటు ఇతర అగ్రవర్ణాలనూ కూడగట్టి భాజపా గుజరాత్‌ను హిందుత్వ ప్రయోగశాలగా మార్చింది. ఫలితంగా 1990లో కాంగ్రెస్‌ 33 సీట్లతో సరిపెట్టుకోవాల్సి వచ్చింది. అప్పటి నుంచి రాష్ట్రంలో కాంగ్రెస్‌ సొంతంగా లేదా ఇతరులతో జట్టు కట్టి కానీ అధికారంలోకి రాలేకపోయింది. 1990లో చిమన్‌ భాయ్‌ జనతాదళ్‌ పార్టీ నేతగా భాజపా మద్దతుతో ముఖ్యమంత్రి అయ్యారు. ఆపై ప్రతి ఎన్నికల్లో కాంగ్రెస్‌పై భాజపా పైచేయి సాధిస్తూ వస్తోంది.
విస్తృత ప్రచారం
కేశూభాయ్‌ పటేల్‌ నాయకత్వంలో 1995లో 121 సీట్లు గెలిచిన భాజపా సొంతంగా అధికారంలోకి వచ్చింది. కానీ, కాంగ్రెస్‌ అండతో శంకర్‌ సింహ్‌ వాఘేలా తిరుగుబాటు చేసి అధికారం చేపట్టారు. 1998లో జరిగిన మధ్యంతర ఎన్నికల్లో కేశూభాయ్‌ గెలిచి మళ్ళీ భాజపా ముఖ్యమంత్రిగా అధికారంలోకి వచ్చారు. 2001లో సంభవించిన భూకంపంలో కేశూభాయ్‌ ప్రతిష్ఠ దెబ్బతినడంతో నరేంద్ర మోదీ ముఖ్యమంత్రి పీఠం అధిరోహించారు.
2002 అసెంబ్లీ ఎన్నికల్లో భాజపా 127 సీట్లు గెలవడంతో మోదీ మళ్ళీ ముఖ్యమంత్రి అయ్యారు. తన ప్రజాదరణతో విజయం సాధించిన 2007, 2012 అసెంబ్లీ ఎన్నికల్లో సైతం ఆయన తీవ్రస్థాయిలో ప్రచారం సాగించారు. 2017 ఎన్నికల సమయంలో మోదీ ప్రధాని పదవిలో ఉన్నా, రాష్ట్రంలో విస్తృతంగా ప్రచారం చేపట్టారు. త్వరలో జరగనున్న ఎన్నికలనూ ఆయన తేలిగ్గా తీసుకోకుండా అహరహం శ్రమిస్తున్నారు. రాబోయే ఎన్నికల్లో మోదీ సమ్మోహన శక్తి తమను మళ్ళీ గెలిపిస్తుందని భాజపా ఆశిస్తోంది. ఈ నేపథ్యంలో భాజపా, కాంగ్రెస్‌, ఆప్‌ల మధ్య త్రిముఖ పోరు ఆసక్తికరంగా మారింది.
ఇదీ చదవండి:
కాలేజీ అమ్మాయికి బలవంతంగా ముద్దులు.. హద్దులుమీరిన ర్యాగింగ్‌
సోషల్ మీడియాలో ప్రధాన పార్టీల ప్రచార హోరు.. రసవత్తరంగా గుజరాత్ ఎన్నికలు
