Instagram Bug Winner : ప్రస్తుత రోజుల్లో సోషల్ మీడియాను వాడని వారు లేరు అంటే అతిశయోక్తి కాదు. ప్రతి ఒక్కరూ పొద్దున్న లేచినప్పటి నుంచి ఖాళీ దొరికినప్పుడల్లా ఫేస్బుక్, వాట్సాప్, షేర్చాట్, ఇన్స్టాగ్రామ్ తదితర యాప్ల్లో గడుపుతున్నారు. అయితే హ్యాకర్లు.. ఇదే అదనుగా తీసుకుని సోషల్ మీడియా అకౌంట్లను హ్యాక్ చేస్తున్నారు.
కొద్దిరోజుల క్రితం హ్యాకర్లు.. ఎంతో మంది ఫేస్బుక్ అకౌంట్లను హ్యాక్ చేసి డబ్బులు కావాలని ఫ్రెండ్స్కు మెసేజ్లు పెట్టారు. అలా పంపి మోసపోయిన వారు కూడా ఉన్నారు. ఆ సంగతి పక్కన పెడితే.. రాజస్థాన్కు చెందిన ఓ విద్యార్థి.. కోట్లాది మంది సోషల్ మీడియా దిగ్గజం ఇన్స్టాగ్రామ్ ఖాతాలను హ్యాక్ అవ్వకుండా కాపాడాడు. అందుకుగాను భారీ మొత్తంలో రివార్డు కూడా అందుకున్నాడు. అవునండీ నిజమే.. అసలేం జరిగిందంటే..
రాజస్థాన్లోని జైపుర్కు చెందిన నీరజ్ శర్మ అనే విద్యార్థి.. తరచూ ఇన్స్టాగ్రామ్ వాడుతుంటాడు. తన ఫ్రెండ్స్ చేస్తున్న రీల్స్ను చూసి ఆనందించేవాడు. అయితే గతేడాది డిసెంబర్లో రీల్స్ సెగ్మెంట్లో బగ్ ఉందని గ్రహించాడు. అందుకు నెల రోజుల పాటు కష్టపడ్డ అతడు.. జనవరి 31న బగ్ను గుర్తించాడు.
ఆ బగ్ వల్ల నష్టమేంటంటే.. మనం చేసిన రీల్స్కు పెట్టిన థంబ్నెయిల్ను పాస్వర్డ్ అవసరం లేకుండా హ్యాకర్లు ఈజీగా మార్చేయవచ్చు. అయితే ఆ బగ్ను గుర్తించిన నీరజ్ శర్మ.. వెంటనే ఫేస్బుక్, ఇన్స్టాగ్రామ్కు తెలియజేశాడు. ఈ బగ్ను నిర్ధరించిన ఫేస్బుక్.. డెమో షేర్ చేయమని అడిగింది. వెంటనే నీరజ్.. ఓ రీల్ థంబ్నెయిల్ను ఐదు నిమిషాల్లో మార్చి వారికి చూపించాడు. అనంతరం మే 11 రాత్రి.. నీరజ్కు ఫేస్బుక్ అధికారిక మెయిల్ ఐడీ నుంచి ఓ మెయిల్ వచ్చింది. $45,000 (సుమారు రూ. 35 లక్షలు) రివార్డ్ ఇవ్వనున్నట్లు తెలియజేసింది. అయితే మే నెలలో రివార్డ్ ఇస్తామన్న ఫేస్బుక్.. నాలుగు నెలల తర్వాత ఇచ్చింది. అందుకు గాను $4500(సుమారు రూ.3 లక్షలు) బోనస్ కూడా ఇచ్చింది.
ఇవీ చదవండి: అమ్మాయిల ప్రైవేట్ వీడియోల లీక్ కేసులో ఇద్దరు అరెస్ట్.. ఆందోళనలు విరమించిన విద్యార్థులు
'మద్యం మత్తులో సీఎం.. కనీసం నడవ లేక ఇబ్బందులు.. విమానం నుంచి దించివేత!'
