కర్ణాటక సీడీ కేసులో వరుస ట్విస్ట్​లు

author img

By

Published : Mar 27, 2021, 11:44 AM IST

Ramesh Jarkhiholi CD case

కర్ణాటక మాజీ మంత్రి రమేశ్​ జర్కిహోళితో కలిసి అసభ్యకరమైన వీడియోలో ఉన్నట్లు భావిస్తున్న మహిళ.. తన కుటుంబానికి రక్షణ కల్పించాలని కోరుతూ మరో వీడియో విడుదల చేశారు. అంతకు ముందు ఆ మహిళకు సంబంధించిన ఓ ఆడియో కాల్​ వైరల్​గా మారింది. వీడియోలో ఉన్నది తాను కాదని, గ్రాఫిక్స్​గా కుటుంబ సభ్యులకు చెబుతున్నట్లు ఆడియోలో ఉంది.

కన్నడ రాజకీయాల్లో దుమారం రేపిన రమేశ్​ జర్కిహోళి సీడీ కేసు.. కొత్త వీడియో, ఆడియోలతో కీలక మలుపులు తిరుగుతోంది. మాజీ మంత్రి రమేశ్​తో అసభ్యకరమైన వీడియోలో ఉన్నట్లుగా భావిస్తున్న మహిళ.. సీడీలో ఉన్నది తాను కాదని కుటుంబ సభ్యులకు చెబుతున్నట్లు ఉన్న ఓ ఆడియో వైరల్​ అయిన మరుసటి రోజునే మరో వీడియో బయటకు వచ్చింది. తన కుటుంబానికి రక్షణ కల్పించాలని అందులో అభ్యర్థించారు సదరు మహిళ.

వీడియోలో ఏముంది?

సీడీ కేసుకు సంబంధించి విడుదల చేసిన నాలుగో వీడియోలో తాను ఎదుర్కొన్న పరిస్థితులను వివరించారు మహిళ.

"నరేశ్​కు ఫోన్​ చేసి సీడీ గురించి చెప్పాను. తాను చాలా చిన్నవాడినని, దీనికి రాజకీయంగా మద్దతు అవసరమని చెప్పాడు. సిద్ధరామయ్య, డీకే శివకుమార్​ను కలవాలని సూచించాడు. నా పరిచయాల ద్వారా వారిని కలిసేందుకు ప్రయత్నిస్తున్నా. నా కుటుంబం సురక్షితంగా లేదని చెప్పేందుకే ఆడియో క్లిప్​ విడుదల చేశా. నేను ఏది చెప్పినా అది ప్రతికూలంగా మారుతోంది. గత 24 రోజులుగా నన్ను ఇబ్బందులకు గురిచేస్తున్నారు. ఏమి చేయాలో తోచటం లేదు. నేను బాధితురాలిని, నాకు న్యాయం కావాలి. ప్రభుత్వాన్ని ఒక్కరోజులో పడగొడతానని రమేశ్​ జర్కిహోళి చెప్పారు. ప్రతి ఒక్కరిని జైలుకు పంపుతానని హెచ్చరించారు. దాని అర్థం ఏమిటి? రేపు వాళ్లు మా కుటుంబాన్ని చంపుతారు. కాబట్టి నా కుటుంబానికి రక్షణ కల్పించాలని అభ్యర్థిస్తున్నా. వారిని బెంగళూరు తీసుకెళ్లి భద్రత కల్పించండి. దర్యాప్తు బృందానికి.. నా కుటుంబ సభ్యుల ముందే వివరాలు వెల్లడిస్తా. జర్కిహోళి పేరు రాసి చనిపోవాలనిపిస్తోంది." అని ఆ వీడియోలో చెప్పారు సదరు మహిళ.

'వీడియోలో ఉన్నది నేను కాదు.. అంతా గ్రాఫిక్స్​'

నాలుగో వీడియో విడుదలకు ఒక రోజు ముందు సదరు మహిళ తన కుటుంబ సభ్యులతో మాట్లాడిన ఆడియో కాల్​ వైరల్​గా మారింది. సీడీ విడుదలైన మార్చి 2నే తన కుటుంబ సభ్యులతో 6.59 నిమిషాలు మాట్లాడారు.

'బయటకు వచ్చిన వీడియో నాది కాదు. అది గ్రాఫిక్స్​ మాత్రమే. అలాంటి పని నేనెందుకు చేస్తాను? ఆ నాయకుడి తరఫు వ్యక్తులు నావైపు ఉన్నారు. జర్కిహోళితో మాట్లాడిన వీడియోకాల్​ మార్ఫింగ్​ చేసినది. మీరు నా కుటుంబ సభ్యులు, నన్ను నమ్మటం లేదా? నా స్నేహితులు నన్ను నమ్ముతున్నారు. నన్ను నమ్మండి. ఆకాశ్​ నాతో ఉన్నాడు. ప్రతి సమస్యను పరిష్కరించి ఇంటికి వస్తాను. ఆ వీడియో కేవలం గ్రాఫిక్స్​. అమ్మానాన్నలను చూసుకో' అని ఫోన్​కాల్​లో చెప్పారు ఆ మహిళ.

ఇదీ చూడండి: సీడీ కేసు: రక్షణ కావాలంటూ మహిళ అభ్యర్థన

ETV Bharat Logo

Copyright © 2024 Ushodaya Enterprises Pvt. Ltd., All Rights Reserved.